曼聯33歲嘅烏拉圭前鋒卡雲尼，上年11月世盃外圍賽對巴西時因惡意侵犯敵軍前鋒李察利臣領紅，家陣俾南美足協追加處分停賽兩場，但呢個決定對曼聯嚟講反而係好消息。南美足協決定罰卡雲尼停兩場，即係話3月作客阿根廷同主場對玻利維亞嘅2場世盃外圍賽，佢都冇得上陣。事實上，因喺武漢肺炎措施下，若球員返南美洲比賽，返國後要接受10日隔離。家陣卡雲尼成個3月都留喺球會候命，應付紅魔頻密賽程，領隊蘇B梗係開心。
另外，受武漢影響，多場歐洲賽需改喺中立場踢。早前歐洲足協宣佈，曼聯作客皇家蘇斯達嘅歐霸32強首回合，將移師意大利都靈嘅祖雲達斯球場進行，次回合就仍喺奧脫福舉行。但皇蘇足球總監羅拔圖奧拿比認為做法唔公平：「我希望次回合都可以喺中立場踢，或者好似上年，等歐洲足協指定一個場地，單場定勝負，我認為我哋可以淘汰曼聯。」