莊韻澄丈夫很體貼，訪問當天他駕車載太太到影樓，很紳士為太太開車門、攞衫，話不多，拍攝時他就坐在一旁用電腦工作，拍完後就拖住太太上飯堂醫肚，難怪莊韻澄都讚他體貼︰「其實我哋一路以嚟感情都好sweet，後來發現有咗BB，我會怨言多啲，話咁啱疫情又唔可以鋪張辦婚禮，又唔可以度蜜月，跟住仲冇埋二人世界，可能初時未做好心理準備生BB。呢兩個月得閒啲本來諗住可以出去拍吓拖，佢怕我個肚大，唔方便，又話散步都危險，驚人撞到我。」
玄學家楊皓雲曾批莊韻澄生牛B對她與丈夫運程有幫助，令她更有信心踏入人生的新階段︰「師傅話我屬雞，牛仔同我會夾，而去年係結婚好年，囝囝出生後我同老公感情會更好，事業亦會順利。」她說去年因為疫情婚禮一切從簡，但生完B後都想為囝囝擺百日宴及補擺婚宴。
復工大計莊韻澄也一早plan好，「陀仔以嚟我一直都冇諗住停工，我諗到我真係覺得唔得至停，𠵱家忙緊盆菜同鹹蛋魚皮生意，我一路都好落力去工場試食，保持品質。」她透露今胎打算開刀，產後休息兩個月就重出江湖︰「我覺得做到就做，最緊要收到身，其實揀開刀係因為怕痛，聽人講陣痛可能痛十幾個鐘，我又睇過啲片啲人喊晒都未生到，我好驚，寧願先甜後苦。」
陀B五個多月，之前一直未見肚，也沒有孕吐、疲倦等徵狀，只是懷孕後情緒變得𤷪𤺧，有時會不自覺發脾氣，「老公都受咗好多，變咗我出氣袋，佢其實都係忍我，但有時會提醒我，講句︰『你呢句說話唔使咁樣講』，令我突然醒覺，係喎！做乜會咁躁？」
莊韻澄首當媽媽，第一胎當然緊張，幸而有莊媽媽在港照顧她，加上疫情，她連陪月也沒請︰「媽咪煮嘢食好叻，所以我唔使請陪月，佢會負責我產後飲食。我好珍惜呢一胎，因為係第一個BB，而且我唔知仲會唔會再生，我想親手湊B，感受吓媽咪當年有幾辛苦湊大我，唔想將咁珍貴嘅片段畀咗陪月。因為疫情𠵱家冇得上產前班，惟有努力上網學，就算餵人奶辛苦我都想試。唔好睇我身材好以為一定好多奶，我媽咪當年都冇㗎，如果冇奶，我唔會勉強，盡自己所能啦。」
懷孕初期不見肚，莊韻澄去年11月拍電影《正義迴廊》時，有場服毒自殺後撻落地的戲份，事前不敢跟老公說，怕他太緊張︰「我係先斬後奏，怕佢話我，不過拍呢場時劇組都知我大肚，雖然地下鋪咗厚墊，但佢哋都好擔心，因為唔止拍一個shot，要撻六、七次，佢哋每次都好驚，係咁叫我小心啲。」
這部電影雖然文戲多，但因為劇情重演「兒子殺父母雪櫃藏屍案」，有很多激動的哭泣戲，莊韻澄說︰「喊戲好多，加上陀仔都令我有啲情緒化，所以拍親激動戲會好快投入，亦入得好深，我係飾演兇手嘅表姐，情緒起伏好大，拍嗰陣心情會好差好低落，好彩我老公一唔使做嘢就一定會過嚟接我收工，之後又會帶我去食好啲嘢、𠱁吓我，令我盡快放低負面情緒。」