今日係年三十，好多市民準備定一家人過新年，不過53位民主派初選參與者今年1月被國安處以顛覆國家政權罪大搜捕，噚日年廿九帶住不安嘅心情去警署報到，因為冇人知會唔會即時被帶上法庭冇得保釋。好多人臨行前都喺facebook發表感言，慢必陳志全更留下「可能係最後一post」，但佢哋同時好積極，提醒港人幾困難都好，總有辦法面對。
慢必個po話最壞情況係即時押上庭唔准保釋，所以佢特別放咗一張珍藏紙張上網，係一位選民多謝佢教識好多家長同志唔係怪物，慢必明顯好重視呢個選民對佢嘅支持，留言話「幸不辱命，無怨無悔」。
區諾軒日前繼續去鯉景灣擺街站寫揮春，仲話呢排刻意如常生活，因為好似一般研究生咁平靜讀書已經係不可多得嘅幸福。把握時間吸收知識嘅區軒，就話保釋程序一嚟就兩個鐘，如果冇帶書睇就嘥晒時間，噚日拎咗唐君毅《人文精神的重建》，區軒亦好積極，寄語香港人無論幾艱困嘅格局一定有應對辦法，希望大家喺亂流下平安。同樣要續保嘅職工盟主席吳敏兒，前一晚仲喺fb上載喺職工盟工作嘅相，講明要為工人做到最後一刻，又話無論有冇得出返嚟，佢都會不停幫人。
2月9號生日嘅鄺俊宇就喺續保前切蛋糕慶生，佢生日願望係「好人一世平安」，又祝願每位善良嘅香港人都有上天悉心守護，「無論遇多大的風雨，我們都能夠繼續在一起」。八方見到佢哋無論面對幾大困境，仍然積極面對，希望香港人可以好似佢哋咁，以正面積極心態面對逆境。八方喺度同讀者拜個早年，祝願民主路上各位同路人牛年平平安安，八方初一到初四收爐，初五再同讀者見面。
李八方
