「超人」李嘉誠起嘅慈山寺，噚日喺facebook專頁介紹寺方栽植咗500棵桃花，以佛前供花之功德迴向大眾，為香港祈福，仲引述「慈山寺功德主」李嘉誠話，知道香港人喺疫情期間「想花」，所以半年前開始呢個栽植桃花計劃，借供花為廣大香港人祈福，超人仲寄望新一年港人具般若之慧，明心見性，福慧同修。
講開呢500棵桃花，專頁介紹係多得本地花農嘅心力，半年前喺寺內嘅正念之路栽植樹苗，一直延伸至觀音像背後，慈山寺亦舉行新春花供祈願，由噚日起至年初四（2月15日） ，市民可以去網址www.tszshan.org/cnywish網上祈願，寺方會將大眾嘅福願喺初五網上法會禮供觀音，祈願有不同類別，包括健康、家庭、朋友、姻緣、事業等，當中一個係「香港（Peace）」，智慧語寫上「人活在希望之中，要感覺到明天會更好」，另一個「我所想（Wish）」則提到「不要小看自己，因為人有無限的可能」，似乎呢兩句係為面對逆境黑暗嘅港人打氣。
李八方