球王基斯坦奴朗拿度（C朗、右）一向都係愛心爆棚，上年3月佢就曾經捐出過100萬鎊（約1,070萬港元），協助各間醫院對抗武漢肺炎，佢亦都係救助兒童會、聯合國兒童基金會同世界宣明會等等慈善機構嘅大使，近期佢又再有單善舉喎。英國《太陽報》報道，有位七歲嘅葡萄牙小朋友湯馬士，喺上年9月不幸確診患上罕見癌症「神經母細胞瘤」，佢嘅父母於是就公開籌募手術費，C朗同女友佐真娜就響應呼籲出手捐錢，家陣湯馬士就喺巴塞隆拿一間醫院接受檢查同腫瘤診治。報道就話原本C朗只係諗住低調行善，但佐真娜（左）嘅姐姐伊雲娜喺ig分享咗湯馬士一家嘅感謝訊息，先至證實咗C朗曾經捐錢資助湯馬士對抗癌症。