死撐封區食白果都係有成果嘅港府，似乎聽唔到市民對呢種擾民措施有幾不滿，好在香港人喺呢年幾嘅抗疫經驗，已經學識港人自救。好似民主黨九龍西團隊，自發協助因應封區而蒙受損失嘅市民入稟小額錢債審裁處，追究政府嘅「白果行動」，有需要嘅九龍西市民不妨按此連結。
港府嘅抗疫邏輯，常人難以理解，唔止唔能夠以科學理據說服港人，更令港人呢期幾乎晚晚都要好似等派彩咁，等待自己嗰幢大廈隨時被列入封區範圍接受強檢。民主黨九龍西團隊則喺呢個時候，向有需要嘅市民提供協助，協助佢哋入稟小額錢債審裁處等法律行動，因應政府嘅「白果行動」，追討相關損失。
九龍城區議員黎廣偉呼籲有需要嘅九龍西市民、商販致電 6932 5350 聯絡佢哋，無論係因應政府嘅「白果行動」而未能返工或遲到，連累收入減少，失去勤工獎勵，抑或係商販因此有損失，如貨品變壞、未能準時送貨或提供服務，都可以求助，以數字向港府證明，港府嘅失策到底有幾勞民傷財。
李八方