周末兩場法甲波中晒，最驚喜冷推摩納哥「讓球主客和」「和局」，結果4:3險勝對手。唔好畀佢停，繼續法國波，不過周中就係踢法足盃，愛隊之一里昂，主場對阿些斯奧，睇個勢要讓兩球或以上，盃賽場合讓太多唔抵玩。馬賽（圖）炒教練之後搞到內部不和，上仗國家打吡又輸畀巴黎聖日耳門，個勢咁頹，不妨繼續玩冷嘢，敲歐塞爾W。
一個領隊或者教練好唔好，對隊波真係好大影響，好似車路士咁，換咗杜曹帶隊，咪又係同一班人踢，都可以拎到聯賽三連勝。法甲就有個反面教材，前車路士領隊波亞斯，今季帶馬賽都算唔錯，有機會爭歐聯資格，不過2月因為同球會收購球員搞到不和，最後仲炒埋。見到佢被炒之後，幾百球迷去到球會總部抗議示威，就證明波仔係得民心。好嘞，教練炒埋，球會成績又繼續低迷，上仗主場都輸畀PSG 0:2，已經七場未贏過。
當然今場對手歐塞爾都唔算係強隊，𠵱家只排法乙第五，不過就貪佢哋主場戰績硬淨，上圈都係喺主場贏波晉級，近6場主場拎到5勝1和。海外博彩公司就開馬賽W大約1.92倍，高對手一級都只讓平/半，一定算係讓得少熱唔透，𠵱家唔知足智彩開邊瓣，可能冇「讓球」盤，「讓球主客和」「主勝」又冇咩肉食，不過直接揀個三倍幾主W仲好。
迪安主場對里爾，里爾幾強勢唔使多講，初盤讓到一球，盃賽都幾盡，就敲佢贏一球，揀個「讓球主客和」「和局」。
文：Goal進
截稿前馬會尚未開盤，盤口僅供參考，讀者記得留意足智彩網頁。