海外醫生要考執業試係先進國家主流。佢哋一樣唔夠醫生，又唔見佢哋政府跳出嚟話要免試？因為守護民康，係應該有不可妥協嘅要求同水準。海外醫生嘅資歷、水平同經驗都不盡相同，因此最客觀、公平、公正嘅做法就係人人統一考試。
新加坡係特例，海外醫生於認可大學畢業可以免試（然後在監督下行醫），當中認可嘅中國院校有北大、清華、復旦同埋交大。都係名校，好合理，right？不過，新加坡係主權獨立國家，咩時候認可咩資歷自己完全有say。
大膽假設香港套用類似的「認可」制度，你估政府如果唔認可埋全國排名369嘅「哈xx佛x大學」，怕唔怕順得哥情失嫂意，俾同胞指摘傷害國家民族感情？
香港醫療十個煲，得七個蓋。唔夠病床，唔夠醫院，高峯期病人要睏走廊，睏足幾十年（情況可以參考《鏗鏘集》40周年特別短片《何時會醫好》）。2000年代初期政府竟然倒行逆施，認為醫護人手過剩，除咗關閉護士學校，削減醫學生學位，更削減公院醫護人手！海外醫生唔係煲蓋。水缸漏緊水，應該要塞住個窿，而唔係加多啲水就算。公院工作環境惡劣，管理不善，導致人才流失。海外醫生亦唔會係個塞。
最後，對於硬係話醫生反對放寬醫生註冊規定就係保護主義嘅人，始終你哋先係最終嘅服務使用者，希望你哋諗下海外醫生嚟到係唔係會令到間病房大咗？抑或佢哋會幫手起到間新醫院出嚟？
先係議員，跟住係社工、記者同老師，𠵱家到醫護，政府打壓係唔停手。我想再講一次，脫下工作服後，醫護到底都是香港人，我們都是命運共同體：「沒有人是一座孤島，可以自存。喪鐘響起之時，不要問為誰而敲，其實是為你我而敲。」抗疫的事就交給我們好了，其他的事希望香港人可以與我們分憂，也為我們挺身而出。
王思啟
公立醫院急症室醫生