福建泉州一位祖母掄起未需要實名制的菜刀，打算將親戚送來的大白鴨加餸。身旁的四歲孫女拚命扯住嬤嬤，不讓她斬。翌日，嬤嬤特意早起瞞着孫女完成殺鴨任務。孫女得悉後不依，但奶奶應承會給她買一隻新鴨。新鴨又寵養得幾耐啊？待孫女玩膩了，祖母把鴨用來鹽酥或掛爐，安心開餐。
香港這隻算是會下金蛋的鴨（或雞或鵝，隨腦細大戶心意）養到今日羽翼齊全，主廚老奶奶忍夠了，終於黑面怒吼唔再嘥米飯餵養，架在頸上的菜刀毫不猶豫鋸落去，拿個盆子承接鴨血，一地飛甩鴨毛鴨腎鴨舌的現場，冇被藍膠帶圍封，住隔籬街的大學女講師匆匆現身擸走鴨尾，猛話食得冇嘥。香港腳已經唔再流行，香港鴨亦一命嗚呼，叫香港加油，怎會有罪，等住落鑊，唔加油點炆得入味？阿蛇做嘢唔使人教但點都要問吓米豬連大廚。大廚與大律，同屬師級，食譜與狀詞由「人民日報」到會包辦，白即刻變黑，得咗。砧板上的香港人，點解唔郁唔反抗？喔，原來是「我75歲打咗國藥疫苗都冇反應吖」那位！