就黃嘉雯胞姊Yuki涉虐畜一事，《蘋果》昨致電大律師陸偉雄，他指片中人士的行為明顯是犯法，涉及虐畜，他說：「呢個法庭係可以考慮刑罰係判坐監，因為如果係專登玩貪得意，整蠱惡作劇，或者只係想睇佢好慘個樣，有惡意去令到動物有不必要嘅痛楚，就構成罪行，除非佢證明成件事係唔小心，先可能冇事。」
陸偉雄指表面上睇片段已足夠令到警方拘捕疑犯，不過片段上並不清楚洗衣機有沒有轉動，他說：「呢個係搜證嘅問題，但係表面已經夠警方採取行動，然後警方會調查。」根據《防止殘酷對待動物條例》，最高刑罰為罰款20萬元及監禁三年，不過律師指刑罰究竟有多重，要到法庭判才知，「首先要睇成件事有乜原因，如果佢認罪，或者初犯，就會判得輕啲。」