特首林鄭月娥向國家主席習近平述職前突然開始封區檢測，面聖後變本加厲賴居民唔應門，表明如果職員相信有人喺屋內，唔排除向法庭申請手令破門。工黨荃灣區議員趙恩來收到街坊報料，發現有一個公屋單位明明貼咗空置單位通告，但民政總署竟然照貼唔檢測就破門嘅警告通告，係咪好諷刺呢？
趙恩來喺facebook貼出街坊提供嘅相，公屋單位門口左手邊有張房署告示，寫住「此房舍已由房屋署收回，任何闖入者將被驅逐或檢控」，門外亦有封條，但民政總署居然喺門上掛警告，地點係上周五被封樓嘅馬鞍山恒安邨恒江樓，話多次探訪要求強檢都冇人應門。
趙恩來鬧爆民政唔識字，無論拍多幾百次門都唔會有人應門㗎啦，民政係咪要爆門入屋，證實係空置單位？佢又同八方講，事件反映民政做事粗疏，唔少街坊話好擔心，如果突然封樓但係被民政爆門，維修費要業主硬食，勞民傷財。帖文引起唔少網民討論，有人揶揄民政總署要改名文盲署，有人心水清話民政爆門，房署負責開支，即係一句到尾由市民埋單。
李八方