啱啱喺上周五度過36歲生日嘅基斯坦奴朗拿度（C朗、白衫），第二日就喺祖雲達斯主場鬥羅馬嘅意甲大戰入面先開紀錄，協助祖記2:0贏波升上第3位。雖然已經36歲，但C朗狀態依然火熱，呢個入波除咗係佢今季第16個聯賽入波外，仲係佢踏入30歲後嘅第300球，絕對稱得上係球壇長青樹！
賽前1日先過完36歲生日嘅C朗，開賽13分鐘就接應艾華路莫拉達嘅回傳，喺禁區頂控定後快腳射遠柱入網，幫祖記領先1:0。意大利天空體育計算，C朗由右腳控波去到左腳射門只係用咗0.52秒，短時間內都可以轟出一記快速而角度刁鑽嘅射門，就證明36歲嘅C朗寶刀未老。
C朗本來仲有機會入多粒，可惜射門省中人之後擊中楣彈出，最好笑嘅係C朗即刻走去叫球證查吓入球係咪有效，當時球證已指住手錶話門線技術冇顯示入波，但C朗心急到想捉住球證隻手睇清楚，最後畀球證笑住推開，顯示出C朗嘅爭勝心有幾咁強；祖記下半場靠對手烏龍波，最終贏2:0。
有數據仲顯示踏入30歲後嘅C朗，入球效率竟比後生嘅自己高，家陣職業生涯總共入咗763球，但30歲後嘅326場比賽入邊，C朗就入咗300球，即係近六年嘅入波，佔咗C朗20年總入球嘅39%。