90年代兒童節目《閃電傳真機》童星張預東（東東），唱《12隻恐龍》唱到街知巷聞，不過鏡頭前的開心果，原來鏡頭後的童年生活一點也不快樂，因要避債而搬屋，又因做童星受到霸凌。年少時期的東東還誤入歧途，自稱曾經「壞過凱婷」的他回憶當年：「可以做嘅壞事都做晒，但我又返到轉頭。」
張預東轉眼間已經32歲，童星出身的他其實自幼家境複雜，日前他接受《蘋果》專訪，重返成長地小西灣憶述兒時點滴：「小西灣分上邨同下邨，我都住過，點解呢？因為以前細個欠人錢，被迫要搬屋，所以住過兩間公屋。」東東沒有開口說出「欠錢人」是誰：「媽咪一個人湊大我同家姐，屋企人爭人錢，後來離晒婚，某程度上有經濟負擔，呢件事（做童星）都幫到屋企。」
東東入行做童星原來有段古，當年他扭計要去電視台玩遊戲，於是媽咪填滿《TVB周刊》內所有表格，剛好東東的名字填在招考小演員表格，結果他順利獲選。提到童星的難忘事，是與「肥姐」沈殿霞一次經歷：「有一次做《兒歌金曲頒獎典禮》，肥姐係司儀，原本布幕一打開，我要講大約一分鐘嘅稿，我超緊張。嗰刻我就知道乜嘢叫大將風範，肥姐拍一拍、攬一攬我話：『東東唔使驚，做返你頭先full dress rehearsal嗰個就得。』就係一句說話令我個人冇咁緊張。」
每個人都有自己的路，東東也曾誤入歧途，有報道指他19歲那年過着荒唐歲月，東東沒說清前因後果，不過直認雖然是名校華仁書院舊生，但曾經學壞，在中二、三已經開始抽煙，他引用網上潮語笑說：「壞過凱婷！加入黑社會？都有㗎，過咗去唔怕講，嚟到我長大嘅地方幾好，屋邨仔又點，壞過咁又點，知道自己唔好就改咗去，我係壞過凱婷好多倍，但冇傷害人，只係傷害自己啫。」有沒有坐過監？他說：「冇試過……總之係一啲年輕人可以做嘅壞事都做晒，但我又返到轉頭，人大自然諗通。」
其實東東也因做童星受到不少霸凌：「以前做童星好慘㗎，喺街頭俾人話《12隻恐龍》，街尾又笑你《閃電傳真機》，但𠵱家諗返又冇乜嘢，𠵱家想俾人笑都冇啦。」但有一件事卻令東東氣上心頭：「以前上連登（高登）成日俾人鬧，最嬲一次係有人話見我喺月台打阿媽，話我學壞唔緊要，但話我傷害我阿媽喎！我俾阿媽打就有，我點敢打阿媽！」
撰文：嵐山
