【本報訊】政府連日突襲封區首次惹來市民入稟索償。在深水埗南昌街經營農場餐廳的老闆陳興濤，不滿上周二晚受封區影響無法營業，連晚巿外賣生意都做不成，日前入稟小額錢債審裁處，追討特首林鄭月娥賠償777元損失。他直言，入稟追討賠償並非只為生意損失，鬧爆林鄭封區「不尊重港人」，案件排期下月審理。
上周二晚7時，政府突然宣佈封鎖深水埗介乎基隆街、南昌街、大南街以至北河街一帶範圍內17幢大廈，列為「受限區域」，要範圍內居民「禁足」強檢，陳的農場餐廳位於南昌街89號，正是當晚被封鎖大廈之一。他指當晚餐廳完全無法營業，「同事打畀我話個舖封咗，冇生意做，走唔到」，當時陳在區內另一間店舖工作，即使趕回去也無法進入店內。
陳直言：「我真係好『㷫』，㷫之餘好大感觸，我係損失咗錢，有數計出嚟要索償777元」。他指疫情下業主主動將租金打七折，他除開每日租金後，日租約1,000元，「我只係夜巿（做唔到）， 咪叫林太賠返777元，佢唔賠，佢有777票，叫支持佢嘅人每人賠返1蚊畀我得唔得？」上周四他入稟小額錢債審裁處要求林鄭賠償，其間他遞交申請書及繳費，並稱已獲受理，排期下月26日上午9時開庭聆訊。
他解釋，入稟並非只為損失，「佢（林鄭）有一種專業失當，令我租用權受侵……我覺得唔單止我，係全港嘅巿民都冇咗被受信任尊重。你突襲式封區，點解唔信我哋會有一種自覺齊心抗疫呢？」他又認為當局封區，是妄自斷定香港巿民自私自利、不懂顧全公眾安全。他會將入稟狀寄往禮賓府，相信香港法治未死，仍可訴諸法律。
62歲的陳興濤，1987年10月創辦農場餐廳，全盛時期曾擁48間店，僱員達1,300人，每天營業額近20萬元。惟1997年一場金融風暴令他破產，「年幾兩年間冇咗48間舖」，當年因借錢擴充業務致債務纏身，結果他按樓套現、借錢都不足還債。風光時陳一家五口住半山5,000呎豪宅，破產後他遷住深水埗300呎唐樓，做無牌小販餬口。2003年沙士期間，他曾擺檔出售口罩及消毒衞生用品。
近年陳興濤東山再起，在長洲重整旗鼓重開農場餐廳，卻遇上疫情又告結業。他希望所賺的錢全用在青少年教育工作，現時他在深水埗開設兩間食店。惟第四波疫情持續兩個月，限聚令一再收緊、禁晚巿堂食，食肆紛紛「吊鹽水」。
說到激動處，他眼有淚光，難掩心中怒火，自言身負「五筆貴利」，每日要搏命賺錢還債。他又揶揄當局抗疫策略，「你唔准堂食，外賣吊唔到命，我已經唔會叫苦連天，由叫苦連天嘅階段、去到日日食黃連，我仲有乜嘢聲出，我哋所有食肆老闆都冇聲出！」他希望飲食業各店主能夠團結，「唔好要求政府畀乜嘢我哋先，呼籲大家聯埋一齊，睇下點幫香港抗疫」。