有個巴西球員因喺球場上當眾除褲展「露鳥」慶祝入球，俾當地足總判罰停賽八場。呢個叫卡利奧卡（圖）嘅球員原本效力球隊係森柏奧哥利亞RJ，喺去年12月1場里約熱內盧第2級別州聯賽對馬利卡嘅附加賽決賽入面，比賽至補時95分鐘射入致勝球後，突然發狂咁先除咗自己上身波衫；然後再將波褲除至膝蓋位「露鳥」。卡利奧卡事後已俾所屬球會踢走，家吓效力緊波圖基沙里奧，而里約足總紀律委員會近日裁定，呢位25歲翼鋒嚴重違反體育精神及道德，判佢停賽八場，但新東家話會為佢上訴。卡利奧卡已就自己行為道歉，承認太過火，但指自己受馬利卡球員種族歧視，先失控做出以上行為。