【本報訊】兩名涉於去年2月「裝修」優品360分店的少年，昨分別在裁判官水佳麗席前應訊，其中患自閉、腦癲癇及抑鬱症的14歲少年早前受審後被裁定刑事毀壞罪成，還柙至昨日判刑；另一名13歲印度裔少年則承認三項刑事毀壞罪。水官明言「與其破壞，可唔可以做啲嘢幫手，令呢個社會變得更好」，亦批評他們為了出啖氣而破壞，對店舖不公，最終判14歲少年感化，印度裔少年則還柙候判。
14歲少年被指於去年2月24日在天水圍天耀商場內的優品360分店犯案，推倒店內貨架貨品及收銀機。辯方求情指，被告須到精神科覆診及服藥，冀法庭可判他入更生中心或感化，讓他繼續覆診及在原校讀書。
水官問被告：「點呀？困住開唔開心呀？」被告回應稱：「唔開心，因為冇得見爸爸媽媽，仲要守嚴厲紀律，因為做錯犯法嘢。」水官續問：「犯法好唔好玩呀？出咗氣，整爛人哋啲嘢，應該好開心㗎喎？」被告則回答：「唔係，會傷害人哋嘅心血。」
水官指，被告的破壞行為會令店舖員工受驚，「佢哋又唔係老闆」，告誡謂：「將你啲唔開心嘅嘢，由自己開始建立呢個社會，雖然你得嗰十四、五歲，但呢個社會會因為你變得更好」。對於被告的邊緣智商，水官則寄語：「你把口好聰明，希望你嘅聰明可以擺喺啱嘅嘢上面。」考慮到被告患病及邊緣智商，或較易在朋友影響下犯案，雖然他經審訊後裁定罪成，但其犯案只涉及一次事件，他在案中的角色是跟隨者，最終判他接受18個月感化。
另外，涉及同一事件的13歲印度裔少年，則承認同日同地犯案，另於同年2月1日及2日，在天水圍嘉湖二期地下的優品360損壞該店的貨品。
辯方求情指，被告的繼父沒香港身份證，故家庭經濟由被告母親獨力支撐。水官質問被告：「係咪好舒暢？舒服晒？出咗啖氣，係咪？你對呢間店舖公平咩？」她告誡被告，作為少數族裔難得識講中文，亦識寫中文，「可以諗吓媽咪對你有幾大希望。但係你出街搗亂，唔知為乜。人哋叫你破壞你就破壞，令媽媽傷心，明唔明？」
水官將被告還柙至本月19日判刑，先為被告索取感化官及感化院報告，其間望他反省，「當你啲朋友嗌你去做呢啲嘢，用你個腦諗下，應唔應該跟。你唔諗清楚，後果唔止你要面對，仲有你媽媽。」水官並謂：「你仲細，喺香港仲可以有你嘅前途。」
案件編號：TMCC700024/20、TMCC700001/21