【本報訊】油麻地早前突襲封區，果欄盛傳劃為指定檢測範圍影響生意，但農曆新年將至，果欄又復興旺，記者昨日直擊果欄發現不少市民到來辦年貨揀生果。對於日前海關在果欄撿獲偽冒貴價「43° South」澳洲塔斯曼尼亞車厘子案件，有市民直言真偽難辨，會盡量幫襯相熟店舖，亦有果欄商提醒市民稱：「塔斯車厘子頂級大粒必賣600元以上，平嘢冇好！」
逃過被突閘的果欄近日恢復人頭湧湧，現場所見不少人買走一箱箱生果，記者所見全部店舖或檔口都有售賣車厘子，大都是來自澳洲塔斯曼尼亞，售價由300元至650元不等，非常搶手。到場選購生果的胡女士自言不懂分辨車厘子真偽，只信相熟果欄：「佢（職員）會畀你睇，睇過先買，唔滿意可以換第二箱，總之要大粒啲囉。」
另一市民朱先生稱盡量光顧相熟店舖，「要我哋分，好難分，都係睇顏色，覺得外貌唔錯就買」，另一名男街坊昨日在果欄買了兩盒塔斯曼尼亞車厘子，售價分別為650元和550元，他認為揀選生果切忌貪平：「真係一分錢一分貨，明明嗰個價，好難平畀你嘅。」他表示，塔斯車厘子厚肉多汁，貴得有道理，頂級大粒售價每盒必定要600元以上，過度便宜必定有問題：「唔單止生果，都係一分錢一分貨，無咁大隻蛤乸隨街跳呀！」
九龍果菜同業商會理事長張志祥提醒市民，貴價生果若價錢離奇地便宜，一定要小心：「價錢差太遠，一定有蠱惑。」張志祥表示，每逢新春，澳洲車厘子屬於送禮佳品，相當熱賣，但近年受疫情影響市道不景，貴價生果相對滯銷，相信今次假冒澳洲車厘子案件，是有人魚目混珠搵快錢。