林鄭政府對待辛勞抗疫嘅醫護人員，就係要醫管局清算去年罷工爭取政府封關防疫嘅醫護人員，要求相關員工喺本月10日前交回「罷工扣糧」支票，至於同樣支持香港醫護嘅李嘉誠，就趁噚日立春，為醫護送上「春天的禮物」，宣佈醫管局全體97,000人員，只要手持佢送上嘅心意卡，就可以喺本月8日至5月31日，喺全港百佳超巿換取同使用$200現金券。
李嘉誠噚日透過李嘉誠基金會fb專頁留言：「謝謝您們（香港醫護）一直守護香港人的健康，我與全港市民一樣，內心都為您們鼓掌！一點心意，與您共勉。」，個post仲有「➕✖️心上人」、「心有醫護」、「心有香港」等hashtag。
若以97,000名員工計，呢批心意卡總值高達1,940萬，雖然對超人嚟講只係散紙，但難得係一份心意，而基金會fb小編亦多謝參與嘅幕後團隊，話「運送心意卡到各醫院，同押送現金一樣刺激，多謝上下一心撐醫護！」
其實李嘉誠已非首次公開撐香港醫護。早喺疫症爆發初期，李嘉誠基金會已為醫護及社福團體送上口罩等保護裝備，其後再宣佈捐出2,080萬，為每名應屆及其後一屆醫科畢業生饋贈5萬元獎勵金，令超過410名畢業生受惠。邊個對香港醫護有心？邊個冇良心只識打壓醫護？相信港人心中有數。
李八方
