張建宗領軍，突閘強檢，一宗都冇。張一宗降呢，神零宗。見冇唔收，港府宣告封街陸續有來，比洗邋遢還要多一日，突襲直至年廿九。禁堂食到六點，被人笑到翻肚，變種病毒難道識得睇農曆？咁荷蘭叻咪要認第二？
一晚襲N區，元朗零舍唔同，畫面回流2019年7月22日。當日瘋傳各路人馬將會殺入元朗，轉發N次的電話錄音講，因為元朗721被無差別棍打的受害者當中有一位是黑幫阿嫂。有早知冇乞兒，元朗冚家斬證實是流料，被跣的鋪頭全日落閘，荒涼的「閘大大」死區，延伸到屯門沙田勁誇張。元朗黑夜與元朗死城，兩日「完成」。今次圍封元朗安興街，附近黃店懵盛盛，其他商鋪收晒風五點前拉閘，「零宗司」又再食白果。揪唔出病灶，阿爺唔會畀讚，被白果鯁喉前，司長不如試吓外判。通宵排隊拎頭籌但唔知肥佬黎係邊位亦唔入法庭聽審那幾個南亞青年，假設屬於圍封下的漏網之魚，寧願整晚瞓街都要突圍。咁，不如排隊配合，湊吓中招宗數。放心，幫政府做嘢，好快以假陽性放生，記者冇機會追問係咪收咗錢，左報絕對唔敢貶低南亞演員做「二等公民」。
話說回頭，鍾南山日日電話聯繫仍幫唔到香港清零，張建宗六次突閘都係零，邊位做實事，有眼睇，吓話。