已故支聯會主席司徒華已逝世10年，支聯會同六四紀念館原定1月開始，喺六四紀念館搞「司徒華逝世10周年」專題展。支聯會主席李卓人同八方講，專題展展品已準備好，隨時可以開放，連展品都已經擺放好，但六四館因疫情閉館，幾時再開都唔知，所以決定將專題展搬到網上，等市民可以睇到。
其實網上展同實體展差不多，有華叔十大語錄、十個華叔密碼、華叔生平、專訪、漫畫等，另外紀念館原本展出華叔生前物品，𠵱家就用照片形式展出，同時仲有華叔嘅十本有聲書，「親子伴讀：《潤物無聲——華叔精選文章聲影檔案》」可供市民喺網上睇。原來華叔1985年首次擔任立法局議員時，拒絕按照當時誓文規定，宣誓效忠英女皇，如果喺𠵱家發生，華叔早被DQ，但當時佢不但冇被港英政府DQ，反而因為咁逼到港英政府修改誓詞，真係今時不如往日。有興趣嘅市民，去六四紀念館網站（https://64museum.blogspot.com/）就可以睇到專題網上展。
李八方