疫苗面世以來，大家亂過亂世佳人，首先是打或不打的辯論，漫天飛舞的黑人問號帶濃郁莎士比亞氛圍，就算你賴以溝通的語文天生缺乏哲學邏輯，問得幾問都周身染上丹麥王子色彩。接下來是什麼人應該先打的爭議，一般西方文明國家紛紛禮讓長者，話就話阿婆阿伯弱不禁風，排頭位合情合理，但恕我疑神疑鬼，這些恭恭敬敬退避三舍的後生，點解平日搭地鐵從無讓座美德，中秋節亦唔見佢哋扮成嫦娥去安老院派月餅，忽然孝順其實會不會是《楢山節考》的二十一世紀變奏，推懵盛盛的前輩做白老鼠？跟住是最頭痛的問題：假如有得選擇，你會揀邊款？當然，對手持BNO的港胞嚟講，肯定更關注「如果有多一張船飛，你會唔會跟我走」，垂詢的究竟是花樣年華的梁朝偉還是今時今日的梁朝偉並不重要，總之把握時機誠意搭夠。
我們這些離岸不愛國份子雖然為水深火熱的港胞焦慮，天天點唱The Clash金曲《我應該留抑或應該走》替他們集氣，始終非常自我中心，加上自幼受古訓「嘢可以亂食，針唔可以亂打」薰陶，仍然把研究世上最可靠的疫苗列為當前急務。盲目崇美的你或者認為我多餘，「仲使諗，梗係有輝瑞就輝瑞，冇輝瑞就摩登乸啦」，哈，不做功課妄下定論因住後悔啊吓，不妨參考基伯的心得。別誤會，國貨不在考慮範圍，原因是我迷信，一個開口埋口「往死裏打」嘅民族，容乜易一語成讖㗎？我的心水之選是Sputnik V，事關蘇聯老大哥乃落毒聖手，憑製毒藥的豐富經驗，製疫苗點會唔手到擒來 ── 一定係，除非唔係。