手機用戶請按此放大圖表
疫情下嘅年宵，先係唔開乾貨位，之後又話連濕貨都唔搞，之後又搞，但就要cut一半攤位，咁之前投咗維園濕貨年宵攤位嘅支聯會又有冇影響呢？支聯會主席李卓人同八方講，支聯會賣花嘅濕貨年宵攤位冇影響，今年賣花以「為自由、共命運、同抗爭」做主題，仲有「五大繡球 缺一不可」賣，但佢自己就慘啲，因為要幫手賣花，搞到要「失身」！
阿人話，食環署cut維園濕貨年宵攤位準則係咁嘅，若投到六個位就cut一半，只畀三個，但好似支聯會咁只投一個就唔cut，所以對佢哋賣花冇影響，而今年賣嘅花，花語會對應「為自由、共命運、同抗爭」主題，好似天堂鳥花對應「為自由」、太陽花對應「共命運」，而仙人掌對應「同抗爭」，而佢哋亦會賣繡球花，取其「五大繡球 缺一不可」。
不過支聯會今次嘅年宵攤位就令阿人犧牲大，佢講笑話搞到要失身！原來食環規定入場所有工作人員要做武肺檢測，佢一直慶幸冇中過要做強檢，點知今次為賣花冇得避，一定要檢測先可入場！至於國安法下怕唔怕支聯會中招，阿人講明年年咁賣，支聯會亦一早講明唔會退縮，而支記濕貨年宵攤位星期六就開始，市民可以去買花支持。
李八方