上星期，係香港開埠一百八十周年。
有趣嘅係，英國原本打算要嘅，唔係香港。當年英國揀島嘅初選名單，包括海南、台灣等等，而大熱門一直係舟山。到咗1840年，香港仲未開埠之前，英軍已經佔據咗舟山。但喺1841年，義律擅自揀咗香港，放棄舟山，亦都因此冇咗份工。
繼任人砵甸乍本來奉命重奪舟山，點知後來掉返轉頭大力爭取都係揀返香港。英方內部都一路未傾掂，到底係揀邊個，兜兜轉轉，翻來覆去。直到1843年，南京條約生效前五個月，英女皇維多利亞，先正式批准扑鎚香港。
重點係，最終揀香港開埠，唔係必然，甚至係爆冷。可以想像，喺揀咗舟山開埠嘅平行時空，成個香港故事劇情，就會搬咗去舟山，由避太平天國、避日本軍、避國民黨、避共產黨、到避大饑荒、避民革，全部改晒走難去舟山。
而平行時空嘅教科書，就住英國人嘅決定而搬龍門，唔再講香港嘅咩青山禪院、李鄭屋古墓、宋皇臺。問題係，如果冇禪師去過舟山旅行、冇古墓喺舟山起徙置區時候被出土、冇皇帝走去舟山跳海，咁點算？冇問題，舟山發生過乜嘢咪寫乜嘢囉。
反正，其實乜嘢禪院古墓，只不過係用嚟過橋。一般情況下，同一空間、唔同時間發生嘅事件互有關連，係合理嘅假設。但當中間出現重大嘅改變，例如外星人降落、海洋帝國殺出等等，將歷史一分為二，「前後必定相連」嘅假設就會變成盲點。
大中華膠剪接，需要營造一個錯覺，令讀者覺得，香港故事嘅開端係自古以嚟嘅中國。所以將明明係一分為二嘅歷史，喬裝為前後連貫嘅上下集。手法係點都要夾硬喺正傳前面，揳一段其實唔相關喺前面扮前傳，博讀者假設前後總有因果，而唔發現原來係風馬牛不相及。
於是英國人揀舟山、開埠前史就寫舟山。英國人揀香港、開埠前史就寫香港。就好似細路仔鬥氣，你企我前面，我就揳返你嘅位，總之就企前過你。
換句話講，杯渡禪師、李鄭古墓之所以值得一提，並唔係本身有乜咁重要，亦唔係對開埠後嘅香港有乜影響（影響係零），而係純粹因為佢出現過嘅地方，咁蹺係英國人幾百年之後揀嚟開埠嘅一部份，所以最適合做作為喬裝用嘅替身。
另一個角度睇，開埠前，「大清沿岸英治小島方便貿易」係個概念，但要揀個實體落地。最終揀咗廣州附近珠江口嘅一個小島，個概念就同塊荒石結合，變成「香港」。情況就如，李澤楷想將盈拓借殼上市，個殼最終揀咗得信佳，上市後叫做「盈科數碼動力」。
如果有分析員，仲用得信佳嘅過往，而唔係新注入嘅盈拓業務，去分析借殼後嘅盈動，應該好快冇得撈。同樣道理，如果俾大中華膠嘅剪接，帶咗去死追開埠前「珠江口小島」呢條冇解釋力嘅線，而忽略咗「大英勢力開拓亞洲貿易航道」呢條主軸，就冇可能組織出健全嘅理解。
當然，香港故事裏面，中國唔係冇戲份。不過並唔係好似大中華膠歷史描繪，咁壓倒性地佔重戲。當「珠江口小島」變成「香港」之後，中國只係群戲裏面嘅其中一個角色。無可否認，開埠後香港，同中國嘅命運，的確係息息相關。只不過唔係大中華膠聲稱，乜嘢血濃於水母子關係。
唔好忘記，敵人，都係同你息息相關。
撰文：宋漢生
fb : sunghsblog