有線中國組成組人劈炮之後加入網媒眾新聞，原來噚日正式開工，估唔到第一日就遇上昂山素姬同緬甸總統被軍方拘捕呢單大新聞，眾新聞中國組即刻有機會顯身手。至於有線新聞方面，就俾有線四人幫搞到雞飛狗走，成個採訪部好多骨幹走晒，聽聞大老闆邱達昌噚日落去視察，仲有禮物送畀員工，但八方聽到呢份「禮物」係乜嘅時候，忍唔住笑咗出嚟：原來係一人一支史雲生雞汁！
先講變身後嘅眾新聞中國組，第一日開工就遇上緬甸變天呢啲大新聞，梗係要表演下，八方見眾新聞facebook出咗幾條有關緬甸變天新聞，入面hashtag咗#眾新聞中國組，包括有當地華人電話訪問、分析中國政府對今次事件睇法，同以前喺有線時候嘅新聞相似，顯示即使去咗資源冇咁充足嘅網媒，佢哋仍然可以發揮到專長。相反自佢哋離開之後，有線嘅中國新聞水準大跌，俾人插完全照炒中央台，八方再去有線中國組fb睇真啲，到𠵱家仲有網民留言插，有人話「中國組一走，山寨中國組迅速墮落」、「從此有線中國組走上新聞聯播之路」。
新聞部俾有線四人幫搞成咁，仲可能不斷有訂戶cut訂，作為大老闆嘅邱達昌唔知點諗？聽聞邱達昌噚日就落咗去新聞部，唔知係咪視察民情穩定軍心喇，八方唔知邱達昌講乜，但線人報料話佢走咗之後，人事部就向每人派一支史雲生雞汁！有好事之徒話今時今日雞髀都唔可以打人牙骹軟，仲要係得雞汁？唔係以為一支雞汁可以穩定軍心嘛！
李八方