好多香港政治人物都有開facebook專頁，近來仲開埋MeWe專頁，希望可以加強同市民交流，但有位政治人物一向唔搞呢啲社交網嘢，佢就係立法會前議員、公民黨吳靄儀，政圈皆知Margaret連智能電話都唔用，更加唔好講開社交網專頁！但最近fb忽然出現一個「Margaret Meme」專頁，入面貼咗Margaret好多訪問嘅截圖，令好多政圈人奇怪係邊個搞嘅呢？
八方問過認識吳靄儀嘅人，佢哋異口同聲話百分之一千唔係Margaret自己或者搵人搞，有人曾經懷疑係咪建制搞出嚟玩Margaret？但睇落又唔似，呢個專頁管理員開宗明義話專頁係純粹娛樂，睇埋內容都估管理員冇惡意，純粹用Margaret嘅cap圖玩下問答之類。不過佢哋話不得不佩服管理員勤力，可以搵到Margaret咁多cap圖，仲有網民話Margaret嘅cap圖問答，有能力挑戰當年高登討論區嘅燦神cap圖你問我答。
李八方