老友記華嫂提醒：揀新春蘭花？要快手啦，「蘭花薈」Outlet人山人海，手快有，手慢冇⋯⋯
離開過年還有兩星期，供花花源咁快緊張？
懶懶閑，皆因去年過年前幾天，被介紹到吾鄉唐人新村孖峰嶺附近的蘭花銷售場時，花海浩瀚種類繁多，埋嚟睇埋嚟揀大把空間！
老友一言驚醒夢中人，今年政府唔嫁又嫁怪裏怪氣的隔離花巿，肯定難似往昔揀得心頭好靚花。疫情肆虐，以為百物蕭條，還擔心「蘭花薈」遇上逆巿，情況卻剛好相反；欲尋好角度拍幾張澎湃蘭花海，觀蘭人來人往，景況猶似年尾花墟或過去上水藥房街，實行影靚相的念頭不易。既替薈主陳生陳太開心，又怕手慢冇難奪心頭好；奪？係呀，想畀錢找數都不易。陳生、陳太，恭喜發財！
蘭花如何成為年花狀元？
過去號稱年花王的桃花，地球暖化下愈來愈難培植，天氣古裏古怪桃花滿枝的風景漸去漸遠，未到年三十、起碼年廿八，誰人夠膽提早買花？只怕等不到過年，花落滿地！
蘭花掛枝頭的花期夠長，品種強壯的類別隨時一兩個月；疫情如泥牛入海，港府？評語已乾涸，自己做好份內事，都無謂嘥口水嘥冷氣，早點購入襟擺蘭花觀賞歲月靜好，人同此心其他年花年前再算。
鄉里兄弟軒仔老遠送來「李公館」多樣年節糕點，閒聊飲食業界面對前所未有的衝擊；火鍋店至慘，無端白事怎會有人中午食火鍋？一般情況只做晚巿的私房菜更慘，一般情況大排筵席，貴價精緻中菜安排二人對嚼、黃昏六點前食完⋯⋯唔好玩啦！
多一句都無謂，就一句：離地，不知民間疾苦！
別無他法，與李公館同級數美食班次只好轉投美食外賣，做得幾多得幾多，重要留得青山在。過年糕點巿場從來暢旺，平有平做，精美貴價類別做出名氣與口碑，只愁做唔切。琳琅滿目李氏出品：傳統年糕、蘿蔔糕、椰汁年糕，還有吸睛無限薑汁千層糕及招牌蜂巢黑糖糕，讓年糕選擇多元化，吃來生動不致流於沉悶。巿逆不在話下，雖然極度辛苦，也在乎閣下能否見招拆招，忍辱負重，咬緊牙關過得這一關，春暖花開蝴蝶自來！