太空卡實名制，政府話，因為大部份犯罪活動都係用太空卡。大部份性侵加害者都係男人，周街男人是不是捉去閹？性侵六個女童收監僅46個月的男警，去勢六次先夠皮。差佬冇委任證衰十一，係咪用了太空卡？
去年九月在彌敦道駕駛新巴970響按，被防暴追前截停，控以不小心駕駛，到近日上庭又改控危險駕駛罪的車長，新增指控他曾經雙手離開軚盤，駛近一個推車阿婆。阿婆，唔係被防暴推倒騎在身上的12歲女童，唔係被幾個差人包括女警大罵「死肥婆」反鎖雙手遭拖行至男嬰早產的42歲大肚婆，唔係硬食限聚告票的王婆婆。差佬一向直銷扶助推車阿婆的鏡頭，就像689鑊鑊在施政報告點名五歲孩子，鄭市長亦曾踎低塞五百元畀來港搵食的強國高齡乞丐。PK被推車阿婆點醒，順便賣人情過蕭芳芳，命令下屬以後只能親近阿婆（拎幾百萬健身的更啱），唔准掂六個未成年女童，喔不，一個都不能掂！以膠帶圍封淫念，守住扯硬的紅線，必達性侵清零！明未啊？大聲回答：Yes PK Sir！