中國唔再承認BNO係有效身份證明同旅遊文件，港府馬上跟隨。不過唔知係駐大陸各大城市經貿辦唔夠緊貼國情，抑或太清楚唔少港商可能都有本BNO傍身，新政實施首日，八方昨日居然仲可以喺包括駐京辦在內嘅四個駐大陸城市經貿辦網站上面，搵到有關點續BNO嘅資訊，但到晚上，部份網站已刪除相關資訊。
據八方觀察，現時喺駐京辦、駐粵辦、駐滬辦以及駐成都辦網站嘅「申辦香港特區護照／簽證身份書／回港證」中「常見問題」一欄入面，仍見經貿辦建議在大陸港人，如果BNO過期可聯絡英國駐華大使館網站辦理換證。相反，香港駐倫敦經貿辦就已經喺29號宣佈，BNO昨起唔再獲港中兩地承認。
睇返政府架構，各個駐大陸城市經貿辦隸屬於政制及內地政制事務局，而香港駐倫敦經貿辦就係屬於商經局嘅工商及旅遊科，政制及內地事務局局長就係將習總張相放喺office嘅「大紅人」曾國衞，佢竟然冇叫人更改有關BNO嘅資料，要唔要問責呢？至於搞港台、又搞sim卡實名制嘅商經局長邱騰華就積極得多，又會唔會有獎呢？不過其實成個措施都只係中國單方面唔承認BNO，唔少國家依然承認。經貿辦教港人照續BNO，話唔定港府可以借機宣傳「一國兩制」行穩致遠㖭！
李八方