馮允謙說，要不是2011年由加拿大返港參加了《超級巨聲3》，他可能已經在加國是位人夫人爸，打緊一份marketing的工作也說不定。
世事就是有很多說不定。後悔返來香港？「如果我喺加拿大，𠵱家已經結咗婚生咗仔女，平平淡淡，但未必會做到我𠵱家想做嘅嘢！」
今年十周年了，值得紀念的年度將「巨聲幫」重新連線，「呢一年就係十周年anniversary，我哋要再見面，上年都有同佢哋食餐飯，我覺得好開心！」當年馮允謙是亞軍，冠軍是很多人已記不起的廖Sir廖仲謙，「廖Sir𠵱家開咗一間補習社，都係教書，我哋好耐冇見，我知佢都有出歌。」
各人有各人的路，馮允謙這個「竹升仔」，今年初在頒獎禮有很好成績，《叱咤》更是三獎在手。開心背後，其實在去年尾，馮允謙經歷了至親的嫲嫲因武肺在加國離世，對他很大打擊。
原先寫給父母和嫲嫲的歌曲，最後完成版本，嫲嫲也沒有機會聽，更加令馮允謙醒覺珍惜眼前人，愛要及時的道理。武肺一周年，由嫲嫲說起。
撰文：文嘉龍
馮允謙這十年間，走過事業高山低谷，不過真正有切膚之痛，是上個月嫲嫲的離世。馮允謙說起當日收到消息時的情境，今天仍然眼泛淚光：「我記得上年12月，媽咪話畀我聽，嫲嫲住嘅老人院有幾單case，二、三樓有啲人有case，嫲嫲住一樓應該OK冇事！過咗幾日，我記得7點鐘朝早，佢就同我講嫲嫲確診咗，姑娘話佢應該48個鐘後就會離開！」
一場武肺，竟然帶走了至親，「其實佢好健康，點解會有呢件事喺佢身上發生呢？真係冇諗過。上年9月，我諗住同我另一半結婚，延期係因為我驚嫲嫲會染到呢個COVID-19，所以我哋就話不如延期啦，但係嫲嫲都係確診咗！」
32歲的馮允謙在香港出世，他歲半跟家人移民加拿大，由於父母忙於工作，馮允謙自細由嫲嫲湊大，「喺加拿大我爸爸搵唔到工做，佢於是返香港工作，我嫲嫲反而代替咗我爸爸角色，佢喺屋企煮飯洗衫照顧我哋，我一歲半到我23歲同嫲嫲都日日見面。我上年寫咗隻歌畀屋企人，好可惜佢冇聽到final mix，呢隻歌叫《小康》，英文版叫做《Days, They’ve Gone Too Soon》，呢隻歌係寫畀媽咪爹哋同嫲嫲。我做咗個online live嘅新碟發佈會，我有唱，我知道佢會聽到！」
因為疫情，不只連嫲嫲最後一面都見不到，馮允謙與身在加拿大的屋企人亦整年未見，「我媽咪同哥哥喺加拿大住，爸爸就喺內地工作，我爸爸有時返香港會見面，媽媽就因為加拿大疫情好犀利要隔離，呢一年冇見過面！」
嫲嫲離世，令馮允謙感嘆人生好短暫，與家人的溝通惟有靠科技，「以前每年返一次加拿大，𠵱家惟有用FaceTime，我真係日日打畀佢哋。上年12月嫲嫲離開咗，我覺得原來人生苦短，要好好把握時間知道人生乜嘢最重要，我覺得冇嘢比屋企人更重要。」
留在香港的，只有馮允謙和他的孖生細佬馮重謙（Tim），馮允謙說兩人是好兄弟也是soulmate，「我同哥哥都close，但係我同孖生兄弟嘅關係，佢係我soulmate。我哋由細到大到今時今日差唔多每一日都見，我哋每一日都傾偈，我有乜唔開心有乜嘢想分享交心，佢都會expect我喺度囉！」
孖仔孖心肝，不過心靈感應反而沒有，「我哋未試過！但係我好知道佢性格係點，有啲人講笑話或者我哋去睇戲，我哋覺得好好笑，其他人會覺得笑乜嘢呀都唔好笑，但係我哋就會get到，所以好得意㗎！」
原先孖生細佬亦都想入行做歌星，但現在成為了KOL，「我2011年7月返嚟香港比賽，佢三個月後返咗嚟支持我，佢原本都有諗住唱歌，慢慢佢覺得做一個artist都幾辛苦，又冇乜私隱！其實佢有上過《巨聲》唱歌，我同監製傾不如叫埋我細佬一齊唱歌，佢唱歌好好聽，我哋可以組一隊組合，但係最後我細佬好似唔係咁鍾意，所以冇入行。佢𠵱家做KOL，成日po啲靚仔相，我成日笑佢嗰啲相。」
曾經想過放棄唱歌的馮允謙，幸好有細佬在身邊鼓勵，「我細佬畀好多支持我，由我入行even有時話想放棄唔想再唱歌，佢就會話唔好咁嘥，做乜唔繼續堅持落去！𠵱家隔咗咁多年，有時我同佢傾偈，當我唔開心想放棄，佢都會明白，佢覺得最重要係要做自己喜歡嘅嘢，𠵱家音樂都係我最鍾意，我覺得音樂未必一定要as一個事業，自己擺啲片喺YouTube都可以，𠵱家科技發達有好多唔同平台可以發揮自己囉！」
馮允謙這十年間的事業最低潮，是三年前的一段真空期，與英皇唱片滿約，但和無綫的經理人合約仍未滿，沒有選擇簽約星夢的馮允謙，惟有靜待這段空白期，「因為仲有舊公司份合約，嗰段時間想有一個新轉變，所以冇續約！嗰兩年有少少迷失，係咪繼續做音樂呢？我唔開心嘅程度去到頂唔順，每一次見到朋友傾起工作，我feel到自己好似好冇用，因為個個又開concert做騷出碟，自己就好似停咗唔郁！嗰段時間雖然收入好少，但係我都要離開香港，我惟有窮遊囉，因為嗰時我另一半飛來飛去做conference trip，一有機會出trip就跟佢去，我去咗馬來西亞、新加坡、日本、韓國好多地方，𠵱家回望返又唔係完全浪費時間，因為嗰段時間寫咗一大堆歌。」
多得側田的一次機緣巧合，馮允謙有機會遇上新公司寰亞，「有一日側田打嚟話佢會做一個mini live concert，佢邀請咗我去呢個party，去到見到好多同行朋友，嗰晚我就遇咗我𠵱家唱片公司嘅A＆R同事，佢問我會唔會考慮簽公司，因為佢哋都考慮緊簽多啲artist！一見面，我就覺得好正，呢間公司畀好多自由我做音樂。」
成長於加拿大的馮允謙，對於廣東歌的認識，全靠爸爸在家中模仿張學友，「我第一次認識音樂就係聽廣東歌，爸爸返咗香港工作，我成日都好掛住佢，我就會摷佢啲cassette帶，佢有好多張學友、梅姐、周華健。我係認識廣東歌先，特別有一首歌我好深刻，爸爸唱咗一隻張學友嘅《分手總要在雨天》，佢成日都會模仿張學友，但係完全唔似，唱得好難聽，佢自己就覺得唱得好好聽，我爸爸好鍾意學友。」他和細佬則最愛Backstreet Boys，「係我自己第一隻用錢去買嘅唱片，隻碟煲到爛，我哋返學又聽，返到屋企又跳舞又唱歌嘈喧巴閉，我媽媽就覺得我哋好煩！我諗𠵱家嗰隻碟已經刮花晒，完全聽唔到。」
因為細佬，更令馮允謙認識到現任女朋友，「我哋拍咗拖都有十年，佢係細佬個best friend嘅朋友，最終我記得喺大學嘅final year認識！」做marketing的女朋友數年前也回到香港工作，兩人去年9月結婚的計劃延期，希望可以在今年完成人生大事。拍拖十年中間曾經分手，依然有緣再聚，馮允謙說：「我覺得好彩係我家庭觀念好好，我有一個好好嘅媽咪爹哋，雖然佢哋都係分開住，爸爸喺內地工作，但係佢哋感情好好！嗰時喺加拿大，爸爸每一日打畀我阿媽三次，我阿媽都嫌煩，但係可以keep到今時今日30幾年！我爸爸講咗一句，佢話女人唔係俾你發洩嘅，係俾你去愛嘅！好多時我都會諗返爸爸呢一句，我覺得珍惜對方係好緊要！」
珍惜，這兩個字是馮允謙去年至今的關鍵字。去年尾推出的唱片，其中有講及世界末日的一曲《開始倒數》，「我知人哋一聽都會覺得好heavy，因為講緊倒數世界末日呢樣嘢，我唔想話信唔信，但我覺得基本上我哋由出世到𠵱家，其實每一日都係倒數緊，只不過冇一個timeline話畀我哋聽，所以我哋要好好珍惜𠵱家想去做嘅嘢，快啲去做唔好等。」
時間唔等人。馮允謙三年前最失意時去了馬來西亞行魔鬼山，帶給他一個領悟，「去咗馬來西亞行一個魔鬼山，上上落落要12個鐘頭。有一個朋友，畀少少錢佢就幫人拎嘢一齊上山，好似一個guide，佢嘅職業就係上上落落幫人攞住啲嘢上山又行落山。我同佢傾偈，發覺佢人生雖然辛苦，但佢好開心，佢有一個好好嘅家庭，呢個人雖然未必搵好多錢，正常人可能覺得呢個人唔成功，但佢得到快樂！我有啲friend搵好多錢，但係佢哋可能都係唔開心！就係因為嗰一次，我諗通咗覺醒咗，之後我簽咗唱片公司，好彩公司又畀機會我！」
除咗時間唔等人，機會都係唔等人，趁住年初在頒獎禮開咗個靚頭，馮允謙要好好衝埋落去喇！
無綫《巨聲》出身的馮允謙，偏偏在今年無綫的《勁歌》頒獎禮獨冇，他在商台和港台奪得的唱作人獎，在無綫反而落空。
馮允謙看得開，「我冇覺得唔開心喎，呢一年有好多人都話鍾意你啲歌，已經係一個好大得着！獎項有好多嘢未必可以控制到，可能係際遇、可能係politics！有更加好，如果冇又唔會唔開心，主要係自己有努力過囉！」
再看看《勁歌》的唱作歌手獎（雖然好多人唔關心！），那位主持說金獎有三位（勁過雙男歌手！），排名不分先後係胡鴻鈞、吳浩康和林家謙！咁，一個人攞三個獎，當然比一個獎三個人分開心！
髮型：JamieLeeHair
化妝：Maggie Lee
服裝提供：agnès b.外套、SPORT b.毛衣