【名家足路】
【對決場次︰西布朗vs富咸】
上周一場意甲大戰，阿特蘭大叫有少少爆冷成份咁贈AC米蘭三隻光蛋，又帶挈小弟喺呢個專欄再下一城。個盤確實好鬼，排第五位嘅球隊竟然作客要讓榜首之師，小弟幾大都唔受莊家𠱁，所以呢個故事又證明，要睇住個盤點開嚟貼波。
至於英超今周就有場護級大戰，由排第19位嘅西布朗主場鬥第18位嘅富咸，結果作客嘅富咸讓平/半，又係怪！或者因為富咸最近連續四場作客都和波，西布朗就主場五連敗，所以就出現咗客軍讓波嘅現象。但講真一場海軍鬥水兵嘅波，冇邊隊有本錢讓對方，平手盤比較合理，但家陣主場嘅西布朗受讓，仲要賠率唔係好低水，咁嘅情況下，冇理由唔落飛捧一捧西布朗。
尊嘉兄覺得艾拿迪斯戰術過時，下下高Q大棍，但講真大Sam有「護級專家」稱號，絕對唔睇小得。呢場護級戰一輸就係「六分波」差距，你知我知大Sam點會唔知，尤其佢數口咁精，肯定叫球員點都要喺呢場踢得搏啲，先有面目返嚟見佢。當以為佢哋周中大敗一場畀曼城後，放下戒心，分分鐘就畀佢哋贏番一場，就好似冇幾耐前連續慘敗完畀列斯聯同阿仙奴後，英足盃又出埋局，結果喺對狼隊一戰，竟然踢出一場好波贏3:2。
講近期整體表現，富咸係好過西布朗，但佢哋對上一次贏波，已經要數到去年12月頭對李斯特城場波，即係就算最近踢得唔錯嘅賽事，都係充其量同對手打和，一支咁耐冇贏過波嘅球隊，作客要讓另一支護級隊，根本冇本錢，所以今次西布朗下盤又係抵得諗。
文：盧卡東尼
《一燈決》係今季新欄目，由上月擂台盟主同上月燈神拗吓頸，睇吓讀者信邊個。