「岳男」、「岳巴」、「岳義士」，20歲的陳以晉前年9月協助數名陌生人逃走，以伸縮自拍棍攻擊防暴警察，即場遭到制服，廣受尊崇。他其後被控襲警、拒捕及在公眾地方藏有攻擊性武器罪罪成，被判監10個月，去年除夕刑滿出獄。重獲自由，再次穿上意義深遠的「岳」字T恤，他反思當日做法可以更好，但對救人舉動始終無分毫動搖，自己不過是忠於本心，或是比人行前多一步，卻非甚麼英雄。日子越來越難過，選擇留在小城繼續當逆民，首要保留實力好好活下去，日後方能伺機挺身而出，「身為一個香港人，你去幫返香港人係應該」。
記者：佘錦洪
到了約定訪問的時間，在鐵窗裏憋悶半年的陳以晉，頂着利落的「陸軍裝」、踩着單車像風一般到達。隨手將一看就知有點價值的單車往石壆一靠，「得㗎啦，架車冇brake冇咩人識踩，呢度都唔會有人偷」，對自己技術有自信之餘，亦對這個地方充滿信心。
西環長大、念書，曾為學校田徑隊代表的他，天生性格坐不定，中一起獲父母默許在區內蹓躂，這個有點老氣的社區的人情味，伴隨他一起成長。推着單車，街口轉角餐廳老闆的招呼，樓下海味舖花貓的揩舐，「香港除咗屋邨之外，街坊鄰里可能大家都唔識大家，但喺西環，社區嘅凝聚力比其他地方好」。
大概是閒置了一段時間，車胎稍微走氣，行幾步轉進後街的單車專門店，相熟的店員即拿出氣泵讓他免費打氣，「如果你換咗第二個社區，你打個氣都要收你五蚊囉」，這種守望相助，是他所信奉行的價值，「始終大家認識大家，大家見到要幫嘅事都係去幫」。
提到西環，必定會聯想到中聯辦，「對我嚟講，『西環治港』呢個概念其實都喺我心目中存在好耐」。這個被戲稱「香港真正管治中心」的所在地生人勿近，之不過定期的法輪功喧囂震天遊行、不定期的社民連棺材衣紙示威，只要是西環街坊，會行過、會路過，總不會錯過，「我初頭對呢啲行為認識唔多嘅，就會問吓屋企人、問吓老師，佢哋都唔係好答到，要詳細啲就要上網查返，自己再諗吓，再轉化成我自己嘅知識」，政治啟蒙也就是耳濡目染，「政府你唔係一味贊成，一個健全社會係需要有反對聲音存在，應該有個空間係畀你講一啲你認為係唔啱嘅事」。
「真正參與社運行動，應該係由香港電視發牌開始。」曾經大多數香港人都對新電視台帶來改革充滿期盼，惟因「一男子」因素而落空，「呢個時候就會諗，點解香港人連一個選擇自由都冇，呢樣嘢令到我走上街頭」。大半年後，反新界東北發展政總集會，陳以晉被警察以藏有攻擊性武器為由拘捕，最終罪名不成立。三個月後，中學生罷課觸發佔領運動，身處煲底的他見證催淚彈發射一刻。那一年，他才13、14歲。
「比起其他佔領區，金鐘的確係一個烏托邦，和平，又好左膠。」從西環到中環，快的話踩單車不過10分鐘，無論是放學後抑或放假，陳以晉就在這個自由的空間遊走，吸收書本以外的知識，「社會運動令到一大班人聚起嚟，探討呢個政府、呢個社會應該點樣走落去」。
偶然認識到電影《V for Vendetta》，一句「Ideas are bulletproof（理念是刀槍不入）」成為那陣時的座右銘，經常戴起「V煞」面具四處跑，「只要你繼續堅持你認為係啱嘅嘢，總有一日會睇到希望」，這種超前的行為與理念很快就遭到指摘，「試過畀人影相話呢個係咪鬼啊，捉鬼，問我你喺度做咩？」
最終佔領運動在久拖無果後黯然落幕，整個社運氣氛亦隨之陷入低潮，「呢個運動過咗去，點樣反思以前個運動，有咩係可取唔可取，再去修正、修補，等待下一次囉」，初生之犢有本錢去等，這一等就是五年。
2019年陳同佳案引發逃犯條例修訂草案，6月12日政總外警民衝突，7月1日抗爭者攻入立法會，運動初期兩次重大事件，陳以晉因旅行而不在香港，「我唔知道佢哋原來會咁升級，呢個係雨傘後既定諗法，即係睇死香港人做唔到咩行為，覺得唔會升級行動。喺呢場運動之後，我覺得香港人係覺醒咗、改變咗」。他其後參與大大小小遊行集會，並以相機記錄這場不再一樣的抗爭，直到9月那一天。
2019年9月15日港島區自發遊行，入夜後有市民在炮台山一帶聚集並叫口號，引來防暴警察驅散。當晚無參與任何行動的陳以晉，相約朋友於炮台山附近晚餐，剛泊好單車，就遇上從大路倒灌的人潮，「警察封咗check line喺前面，我過唔到去停咗喺度，佢走嚟驅趕聚集喺度嘅人群」，不久一陣突如其來的騷動，多人被防暴警察撲跌，「佢哋又冇違法行為，只係企喺度叫囂、嗌口號，你就走過嚟驅趕，仲要拘捕，我覺得係唔應該」。
其後過程被電視新聞畫面詳實記錄，身穿灰色行山品牌「岳」字T恤的陳以晉，從背囊掏出一支伸縮自拍棍揮向身前警員，被該警員壓在身下的市民順利逃走，自己卻未能離開，遭多名警察以警棍及胡椒噴霧制服，頭破血流。最終他因襲警、在公眾地方藏有攻擊性武器及拒捕，被法庭裁定罪成，合共判監10個月。
一年多後首次重返舊地，事發一幕再次浮現眼前，身體無可避免變得繃緊，「都幾大壓力，個腎上腺素上升」。他說入獄後曾經有後悔，但不是後悔救人，而是後悔未有採用更好的手法，「可能唔用棍唔扑佢，和平啲大愛抱住佢？反正都係犧牲㗎啦，咁抱住佢啦救人啦」，認真說着玩笑的他眼眶漸變濕潤，「對佢（警員）可能好啲，對我可能又好啲，或者唔會咁傷，但結果都係一樣（入獄）」。假如重來一次，會否依然選擇回頭救人？「會囉，我咁多年做人、讀書、睇書、長大人生經驗，講畀我聽就要做呢樣嘢，去犧牲自己成就他人，做人應該係咁，喺你有限嘅能力盡量幫人。」
從這一晚起，「岳義士」的尊稱不脛而走，有人視他為英雄，「我未稱得上係一個英雄，我唔係做啲咩好偉大嘅嘢，只不過係比起其他香港人行前咗一步。可能係因為我冇咁多負擔，我肯付出自己嘅時間喺香港，青春喺香港，坐監，無乜嘢嘅」，有人視之為暴徒，「犯咗法喎，梗係暴徒啦，我上埋暴徒網??」，身邊朋友亦漸漸改口叫他「岳仔」、「岳巴」，「名字只係一個稱呼啫，你鍾意點嗌我都得，呢個名更加知道我係鍾意行山嘅人囉。」
記者問陳以晉，在牢房半年最掛念外面甚麼，他沒有猶豫馬上回答：「行山。球場隔住鐵絲網，每日望到左右兩座山，好想快啲出去行山。」這天他就約記者走一趟鳳凰山，亦即是自己在獄中出版的相集《自由山岳》封面相片拍攝地點，邊走邊說，原來同樣與社運脫不了關係，「嗰陣雨傘運動好多帳篷，大家離開無理由浪費，咁就拎走佢，就會行吓山露營咁樣」。由嘗試變成興趣，全因行山可以逃離荒謬的現實，「有時啲地方手機收唔到訊號，睇唔到新聞反而覺得舒服」。
不過在香港登山，環顧左右，依然是各種人工建築，於鳳凰山山脊一側眺望，便是塘福懲教所，「盧建民、6.12救生員、機場打付國豪（的人），幾個手足都喺嗰度」。因反送中等政治案件而入獄，陳以晉稱他們有公眾關心，往往會獲大Sir「特別對待」，「佢哋好怕我哋將入面情況講畀外界聽，所以就會特別對待我哋──樣樣嘢都按規按矩，冇特別好或者特別唔好，咁樣已經係『特別對待』」，但過去一年因武肺疫情，囚犯放風時間銳減，日子更加難捱，「收到信係我喺入面嘅慰藉，可能我比較多人識，成日都會收到信。但除咗關心我呢啲比較出名嘅手足之外，都可以關心啲無名手足，可能大時大節畀啲祝福佢哋，或者同佢哋做筆友，佢哋係好需要呢啲支援」。
正式判刑當日是去年6月30日，亦是港區國安法實施的日子，「呢半年時間都有keep住睇新聞，睇到出面發生咩事，但唔係自己經歷過，感受唔到香港人對《國安法》嗰個恐懼」，想不到出獄短短兩星期，就已經見到初選大搜捕，又有支援12港人的律師、志願者被捕，「香港𠵱家每晚都好似《狼人殺》（卡牌遊戲）咁樣，每朝起身就有個村民消失。但呢個遊戲就得狼人同村民，無其他人」。
他引用近來廣泛流傳的「新三民主義」，認為香港人只餘三種去向，「順民、逆民同移民。如果你揀做逆民，你個心態要好tough，你要好硬淨，你要唔可以跪低，你要唔可以屈服喺呢個政權底下；如果你做順民嘅，你就乖乖哋唔好諗政治，唔好理咁多；你做移民嘅，就走啦，放棄呢個地方」。而他自己的選擇亦相當直接，「我暫時都係一個逆民嚟，仍然唔肯跪低，仍然對抗」，接下來首要做的，就是繼續學業，同時會積極籌備下一本相集留住香港的美，等待下一個時機，「作為一個逆民做到嘅就係保留實力，做香港人要做到嘅事，然之後好好咁活下去」。
20歲出頭，努力過，付出過，犧牲過，他強調只要牢記一個身份，無論何時何地，大家自會明白責任所在，「身為一個香港人，你去幫返香港人係應該。」
