【名家足路】
【對決場次︰西布朗vs富咸】
上星期推介AC米蘭，雖然筆者本身唔太鍾意呢隊波，但作為榜首球隊主場受讓咁筍，結果就中咗伏，米蘭吞咗阿特蘭大三蛋，令筆者喺呢個欄目已經輸咗三次，作為本月「燈神」嘅最後一擊，決定揀場英超護級大戰，西布朗對富咸嚟拗吓頸。
早前姜濤贏咗叱咤我最喜愛男歌手，或者唔少人都覺得意外，但正如森美話齋，係咪你唔熟悉呢個世界呢？計我話，我哋唔應該再留戀一啲Out晒嘅護旗手同大媽身上。其實領隊都係一樣，10年前英超護級隊要搵艾拿迪斯、曉士、布魯士之流，10年後仲要靠佢哋？唔好玩啦！呢批領隊嘅戰術仲停留喺90年代嘅英式足球，好似𠵱家呢隊西布朗，本身都有個巴西仔馬圖斯佩雷拉值得期待下，點知艾拿迪斯嚟到就大踢901戰術、高Q大棍，佢哋可以成場波唔攻，但靠死球同手榴彈博入波。
冇錯，開頭可能有啲球隊唔慣呢種舊派戰術，俾艾拿迪斯偷到雞，但相信各隊已經加強練習，對住獨沽一味嘅西布朗開始識防範，所以西布朗近期5輪聯賽都輸足4場，當中有3場仲要俾對手狂數4球或以上。冇錯富咸本身都係英冠料，但領隊柏加勝在夠開明，季初測試過用前季降班嗰套陣，靠晒中鋒阿歷山大米祖域原來係唔掂之後，試吓改用一啲快馬盧卡文、艾雲卡華利路組成攻擊組合，早前幾乎打瓜利物浦同熱刺。
香港人經常都話，未來係屬於年輕人，咁今場你會揀66歲唔識進步嘅老油條艾拿迪斯，定係後生26年比較開明、肯變化、唔啱改到啱嘅柏加？撐年輕人嘅今場一於撐吓少帥帶領嘅富咸喇！
文：尊嘉
《一燈決》係今季新欄目，由上月擂台盟主同上月燈神拗吓頸，睇吓讀者信邊個。