雲浩影（Cloud）在ViuTV《全民造星III》中被視為大熱，最終「梗頸四」，但她在全民投票中，卻獲得最多票數，此數字正好反映她擁有龐大的fans群以及極強的觀眾緣，做明星的必要條件。
撰文：王梓嫚
攝影：沈健程
花名「雲姨」22歲的雲浩影，曾被《造星III》監製黃慧君（花姐）和節目旁白君笑她說話直，經常失魂蝦碌，令人覺得她無心戀戰，但正正她有碗話碗的個性，吸納了大批「迷暈黨」追隨。據Cloud透露，其Ig賬戶上月才開啟，目前已有五萬多followers，勝過不少出道日子不淺的藝人，「或者大家覺得呢個人好似自己身邊一啲friend咁，所以覺得好親近。」她雖然不介意名次，但對於自己落敗令fans失望，也感到有點不好意思。
Cloud早前在Ig做直播時，「跪求」李靜蓮（Alina）送二手衫給她着，還透露平時和媽咪、細妹撈亂衫着，慳得就慳，Cloud直認不諱：「堅呀！媽咪同細妹都會攞我啲衫呀、鞋呀着出街，其實Alina比賽嗰陣已經畀咗好多衫我着，𠵱家要出鏡，但我屋企啲衫唔係黑就白，當初我曾經嘗試着呢啲素色衫上舞台，但花姐就會皺住眉話『唔……呢啲唔係着上台嘅衫！』冇計，惟有周圍撲衫。」
慳荷包不敢置裝，在過去半年比賽期間，Cloud已花掉銀行戶口九成積蓄，由接近六位數下降至近四位數，「嗰時晚晚半夜先排練完，搞到成日要搭的士返屋企，化妝、行頭都係自己畀錢，我連dancers都唔敢請。」提到比賽後有不少廣告商自動找上門，Cloud身價水漲船高，她睜大一雙圓眼說：「全部未收到錢㗎！𠵱家仲係財赤緊。」
早前傳出被多間唱片公司爭奪，Cloud顯得一頭霧水表示「唔知情」，不過對於揀公司，她要看自由度，希望有時間可以邊唱歌，繼續打份文職準時出糧，「我𠵱家都係打緊寫字樓工，不過比賽至今一直停薪留職冇收入。」誰會想到，唱歌了得的她，原來最想過的是朝九晚五OL生活。
盛傳ViuTV有意組女團變女版MIRROR，不過自言跳舞一般的Cloud，就認為自己唱solo感覺會好一點，既然不想入女團，為何當初加入家燕媽媽旗下的Honey Bees少女組合？她說：「嗰時參加好多比賽，其中一個係家燕媽媽搞嘅，贏咗啲coupon諗住唔好嘥，咪用嚟上佢啲堂囉，反正都係興趣班，結果俾學校揀卒入咗團。」「慳妹」周慧敏看來終於後繼有人！