歐洲主流聯賽賽程密過蜜蜂竇，結果周中波造就唔少冷門，連曼聯都可以主場輸畀降班膽錫菲聯，英冠、荷甲都連場爆冷；呢個冷風會唔會延續到周末？其他聯賽就有可能，不過法甲就未必，事關法甲周中只進行一場補賽，大部份球隊都有得唞吓氣，戰果應該較為正常。巴黎聖日耳門（PSG）換帥後未輸過，近期仲越贏越易，下星期日作客羅連安特，炒得起。
講真以PSG嘅人腳，稱霸法甲只係基本任務，普捷天奴嚟到，唔單止要贏波，仲要贏得漂漂亮亮，始終𠵱家仲喺蜜月期，佢又要老細科水買人，包括佢帶熱刺嗰陣嘅愛將迪利阿里，呢輪鬥志唔使懷疑。而且PSG嘅傷兵問題都大致解決，尼馬復出後已經連番建功，普帥接手球隊後，排出莫路伊卡迪、尼馬、基利安麥巴比、迪馬利亞四人攻擊組合，入波真係唔使擔心；睇番海外莊家賠率，PSG客W只係1.18倍，預期足智彩都會開[-2]，「讓球」盤可能開讓球半/兩球，求好分頭一定要「讓球主客和」「客勝」。
之前提過法甲周中只有一場波，正正就有羅連安特份，佢哋主場對迪安呢場護級大戰，就踢到補時階段靠對方門將送大禮擺烏龍，先至險勝3:2。不過今次硬拼PSG就唔會咁好彩，本身周中激戰一場，體力消耗已經多，防守又唔見得出色，近6場都單場至少失2球，今次只望輸少當贏。
星期六獨腳戲有蒙彼利埃主場對朗斯；蒙軍呢排好沉，上仗俾PSG大炒四粒，近七場未贏過，門將莊拿斯安連拎埋紅牌要停賽，朗斯作客贏過馬賽、摩納哥等強隊，初盤開平手，一定要客隊。
星期六（待定）朗斯（平）
星期日（待定）巴黎聖日耳門勝[-2]
文：Goal進
截稿前馬會尚未開盤，盤口僅供參考，讀者記得留意足智彩網頁。
1. PSG已連續12次擊敗羅連安特，首循環主場以2:0勝出。
2. 西部聯及墨爾本勝利開季均進行三場比賽，雙方都各有2場比賽總入球達3球或以上，開「大」比率有66.7%。