近日「妹妹」特首林鄭月娥忙於同國家領導人、全國政協副主席梁振英隔空拗特首協商定選舉產生好，「姐姐」新民黨主席葉劉淑儀就忙於同中央交心。除咗先前提議取消BNO雙重國籍，葉劉再以佢嘅神邏輯喺Twitter向外國「證明」中共冇喺新疆執行種族滅絕，但再令佢醜出國際，俾外國記者恥笑。
葉劉噚日貼出一張維吾爾族女藝人迪麗熱巴嘅相，話美國指控中國喺新疆執行種族滅絕，但其中一個當紅藝人廸麗熱巴，正正係新疆嘅成功故事，反問「何來種族滅絕？」
貼文一出，立即引起各大外媒記者留意，fb專頁「Goodbye HK, Hello UK」收集一眾外媒記者嘅啜核回應，其中路透社國際新聞編輯Gerry Doyle「應用」葉劉神邏輯，話已故著名美國黑人搖滾樂手Jimi Hendrix喺上世紀60年代，係最紅嘅音樂人，「咁就證明到60年代美國冇種族歧視喇。 」Gerry仲好細心咁喺帖文註明葉劉係香港立法會議員，葉劉今鋪真係揚名國際啦。ITV NEWS駐京特派員Debi Edward都話，多謝晒葉劉，「仲使乜證據呀，多謝晒喎，淨係得成功故事同明星 ，肯定冇種族滅絕啦。」
外媒記者真係曲到圓，但法新社港澳台編輯Jerome Taylor直線抽擊，反問因為一個明星，就證明冇犯人道罪行㗎喇咩？《經濟學人》記者Don Weinland都話葉劉：「出咗條可能係世界上最可恥嘅Tweet。」
香港網民紛紛鬧爆葉劉歪理，有人反駁話「滅絕係過程，如果冇晒叫絕種」，又有人笑佢太想做特首，「想到壞咗個腦」；亦有人奉勸大家唔好咁mean，葉太只係擦鞋擦出禍。
李八方