自從立法會冇咗民主派，建制懶開會又或開會蝦碌已經唔係新聞，但今次就離譜到開開吓會，走剩個主席坐喺會議廳，就真係好過份。八方講緊噚日開嘅司法及法律事務委員會，開會期間可以走剩主席張國鈞一個喺度，咁點叫監察政府？
噚日開嘅司法及法律事務委員會開會討論到第三項議程，都仲有工聯會郭偉强、經民聯梁美芬、謝偉俊在席發言，但去到第四項議程，即係討論有關中港仲裁補充安排修例建議，除咗主席張國鈞外，其他建制派議員全部走晒，成個會議廳空蕩蕩。
張國鈞見到四野無人，但會又要繼續開，惟有硬住頭皮叫普惠避免及解決爭議辦公室主任丁國榮解釋文件，當丁國榮解釋完文件，都仲係冇人，張國鈞惟有自己問問題，但到丁國榮再答完，仍然冇建制派入嚟開會，張國鈞都冇得拖，只好宣佈進入下一項議程，10分鐘就完咗個議程。
呢個時候自由黨鍾國斌返入會議廳，但夾埋都係得兩個人。其實成個委員會有13名建制派委員，但副主席廖長江、新民黨葉劉淑儀、何君堯、民建聯周浩鼎等全部no show，佢哋以前成日鬧民主派唔開會搞流會，咁佢哋唔開會又點計？
李八方