32歲的許廷鏗由TVB的巨聲幫起步，捱過了「公園事件」，踏上紅館開個唱，離TVB被雪，今年元旦首奪叱咤男歌手金獎，然而，頭十年順風順水的他卻心存恐慌！他說一個歌手想唱自己的東西，那種堅持不足為外人道，而音樂知音林夕就寫出他內心的恐懼。未來十年他最希望繼續做自己︰「希望內心仍然澄明，對自己所作所為行事，仍然覺得對得人拜得神。」
許廷鏗2011年出道即橫掃四台新人獎，受盡冷言冷語︰「『得個樣嘅』、『佢多曝光啫，劇集歌嘛！』我記得唔係小器，反而係向前嘅動力，曾經我嘅作品喺YouTube dislike多過like，𠵱家聽返隻歌，自己只係做樣投入，冇infect冇影響力，當時以為呃到人，原來呃唔到。」
2017年許廷鏗離開星夢逃離TVB，重新開始，去年新碟《Negative》請林夕寫出他內心的恐懼——《慌》，他坦言自信心欠奉，身體虛弱依然找營養師減肥︰「我嘅驚，驚自己喺人哋心目中嘅形象，好在意大家點睇自己，夕爺將佢變歌詞，當你乜嘢都驚，其實有乜嘢需要驚！」他離開星夢前的最後兩張大碟，是逼自己唱歌︰「有個階段想蒙混過去，若干年後，有樂迷由鍾意到離棄我，佢話覺得我唔鍾意做緊嘅嘢，佢一講我忍唔住喊咗出嚟。」
當林夕在內地變「佚名」，許廷鏗依然請夕爺作詞，「有日佢打嚟同我天南地北，其中『感激』呢兩個字，我心領神會，我都同佢講返感激，佢嘅《我的志願》、《恐怖情人》，一直教緊我某啲嘢。好記得《我》經歷同父母跟我事業諗法唔相符，我send咗張圖畀夕爺，父母攞鉸剪剪咗囝囝對翼，本身歌名《誰剪斷了我的翅膀》，份詞睇到一半我喊咗出嚟，佢用歌詞話我知爸爸媽媽角度係為我好，剪斷我翅膀佢哋點會唔痛，只係唔想我行冤枉路。」
許廷鏗的父親是香港腎臟基金會副主席許義鏞，從事貿易生意，傳手持過億物業，哥哥許永鏗是banker，兩個姊姊分別是醫生和banker，雙親對孻仔寄望甚殷，問許廷鏗努力的成績有否改變父母對他唱歌的態度？他說︰「從第一日開始，佢哋一方面戥我高興又為我擔心，呢個獎話畀兩老知道，個仔努力得到認可。」他說朋友為給他驚喜，預先叫父母拍片賀他得獎︰「阿爸好老正話『恭喜你，爸爸都為你感到好驕傲。』我媽咪冇講嘢，喺隔籬撞爸爸，『夠喇，講好長。』佢哋唔慣做呢啲，我喊住睇，笑住喊，百感交集。」未來十年，他指最希望繼續做自己。
目前對愛情沒渴求，許廷鏗卻喜遇知己鄭欣宜︰「喺佢面前我可以肆無忌憚講真話，朋友中同佢嘈交最多，我哋係朋友以上，戀人未滿，最後變成親人，以異父異母低能巨孖寶自居。」
撰文：余燕儀
場地提供：SKYE Roofbar and Dining
