由工聯會吳秋北抹黑港台而引發嘅一場罐頭大戰仲未打完，689連日嚟都有加入幫口，搞港台之心路人皆見，佢噚日繼續追擊，仲編劇上身講咗個「張三酒後駕駛，警方放人」古仔出嚟，想用嚟類比港台，但佢唔知咁講等同公開摑咗PoPo一巴囉。
689個古仔話，主人翁張三係知名人士，有日酒會祝酒喝咗一小啖香檳後揸車走，點知遇上警察要求做酒精測試，然後合格冇事可以走，689呢個時候就擺港台上枱，聲稱如果係港台報道，就會講成「張生酒後駕駛，警方放人」，錯在唔去講「酒精讀數十分低」，令受眾得到警察不敢告張三嘅印象，實行用個假設性劇情去扣港台帽子。
不過八方覺得689呢個古仔恐防唔係虛構，事關佢一上台做特首，作為梁粉嘅陳茂波做咗發展局局長，就被傳媒踢爆午餐時連飲兩大杯啤酒再揸車，不過當時就冇俾警察截查，至於佢去「自首」但被放生已經係後話啦！
另外，日前PoPo為寸港台，夾硬出po抽水，正正係話「切勿酒後駕駛」，英文係「If you drink, don’t drive」，而唔係話酒精讀數低就飲酒可以揸車，689呢個po等同公然與切勿酒後駕駛唱反調，PoPo要唔要公開澄清呢？
李八方