國際米蘭周二喺意大利盃八強，憑基斯甸艾歷臣補時射入靚罰球，以2:1絕殺宿敵AC米蘭晉級4強。今場大戰火藥味甚濃，米蘭嘅伊巴謙莫域被指出口冒犯國際前鋒盧卡古，雙方一度爆發衝突，球證最終出示黃牌警告兩人，伊巴仲因為喺下半場從後踢跌國際嘅高拉洛夫2黃1紅被逐。上半場44分鐘，盧卡古俾阿利斯奧羅馬洛尼撞跌後唔滿意，伊巴就被指出口冒犯呢位比利時前鋒，叫對方做「小驢子」。盧卡古亦唔示弱，同伊巴「鬥牛式」頂頭對峙，仲話：「f**k you and your wife（X你同你老婆）！你敢冒犯我阿媽？」最終兩位前曼聯隊友被拉開。米蘭教練皮奧利承認伊巴下半場被逐令「紅黑兵團」陷於劣勢，不過伊巴已經為事件道歉。國際教練干地就大讚盧卡古可以保持冷靜專心比賽：「伊巴充滿爭勝決心，係個戰士，盧卡古喺呢方面亦有好大進步。見到佢充滿『火氣』，我真係好高興。」