張致恒（Steven）在前年7月突然宣佈與粉絲區燕雯（雯雯）誕下囝囝兼結婚，但其後驚爆他一腳踏五船，令他被封賤男工作量大減。昨日《壹週刊》報道指Steven欠下周身街數，好友馮鎵瀠（Naomi）在社交網鬧爆Steven有錢請工人、買電器卻欠債不還。Naomi昨向《蘋果》表示借了五位數給Steven，更大爆：「原來有好多人都中招！」林盛斌及張彥博等也是苦主。
現年36歲張致恒前年與雯雯奉子成婚，更兩年抱兩，雖然他被踢爆一腳踏五船，工作量大減，但他為養家到酒店餐廳當散工，又在Ig塑造好爸爸形象。正當以為他修心養性，雯雯日前在Ig出post公審老公拒絕幫手搬電器：「當你拎住好多嘢，仲要包括電器，其實都只係希望姐姐可以出嚟村口幫手拎，打畀老公問佢，老公同我講：『姐姐好忙……』」令𡃁模Naomi在fb揞名寸爆，有藝人有錢聘請工人兼買新電器，但卻堅決不肯還錢。據知Naomi現從事美容工作，因疫情停業手停口停。
Naomi昨日向《蘋果》表示Steven是在前年7月借錢：「我借咗五位數字畀佢，佢話當時投資咗錢落自己演唱會，周轉唔到，演唱會後就會還畀我，或者內地商演出糧後，大概一個月左右可以還錢。」豈料他至今仍未還錢，Naomi續說：「我好無奈，見到買新電器同請工人嘅新聞，原來人哋嘅生活過得好過我咁多，我就要節衣縮食，面對停業難關，我真係超級勁嬲！原來有好多人都中招，大部份係幕後，亦有啲係教會同佢合作過嘅人，人人都係2,000蚊。」昨日新聞曝光後，Steven忽然主動聯絡Naomi承諾還錢。
有指Steven婚前婚後都不停問身邊友人求助解財困，債主包括林盛斌（Bob）、張彥博、新城DJ林柏希等，林柏希昨日回覆《蘋果》：「Steven有問過我借錢，最後冇借畀佢，我有諗介紹份工畀佢好啲。佢冇覆我，我都有同佢家姐傾過，佢家姐叫我諗清楚。」Bob則表示借過幾萬蚊予Steven應急，但沒追對方還錢，希望他努力工作，日後環境好可以清還債務。其實Steven近日有工作，在內地有拍攝網絡電影和商演活動，更有指他兩名兒子的用品和玩具都是名牌。Steven家姐、前藝人張詠恩見弟弟開支大增，本提議他搬返觀塘翠屏邨老家，但遭拒絕，Steven反而租下村屋和花數千元聘請外傭。
Steven昨午在Ig解釋是在沒收入情況下，迫於無奈借錢，他大呻：「因為疫情影響下被炒過好多次，我有努力工作搵錢，希望可以支撐到屋企之餘，仲可以還到錢畀朋友，但係工作完嘅收入都唔夠屋企開支。」Steven表示兩年前已經聘請外傭，又指電器是用積分換，兒子的玩具及衣服均是婆婆及朋友送贈。至於為何不搬回觀塘公屋住，他指：「我哋有三隻狗，屋邨唔畀養狗。」雯雯昨日則將Ig賬號轉為非公開，兼刪掉所有post。
