喺大家等緊港超聯開番波嘅時候，亞冠盃同亞協盃禮拜三就抽咗分組啦，會踢亞冠盃嘅傑志入咗J組，同組有山東泰山、泰港之外，仲有一隊外圍賽球隊，有機會係大阪櫻花或者墨爾本城。傑志主教練朱志光都話算好籤，但最緊要都係快啲有得練波同比賽先囉。
傑志繼2018年後再次直入亞冠盃分組賽，朱sir之前都話想避開啲爭標分子，但就冇講明係邊幾隊。抽籤結果噚日出嚟，對手有中國嘅山東泰山、泰國嘅泰港，剩番一隊係就係日本大阪櫻花、澳洲墨爾本城同緬甸撣邦聯去爭，牌面上最強嘅中國廣州、全北汽車等等都避開晒，朱sir都話算好籤，「避開咗我心目中嘅強隊，但暫時就唔知點plan囉，本地波停咗，到4月時比賽狀態可能唔係最好。」
朱sir仲話，今次踢賽會制，少咗三場主場比賽，冇球迷打氣幫助下，係有啲蝕底。雖然朱sir都講過吓話想申請協辦，但連港超聯球會都冇得練波，你覺得個政府畀唔畀你搞比賽吖？除咗冇球迷打氣，頻密比賽都係一個考驗，朱sir話：「三個禮拜內要踢咁多場波，緊密比賽下要輪換球員，體力恢復都好重要，睇吓嚟緊可以點plan，希望打好啲，有啲交代啦。」
傑志之前簽咗巴爾拿同「黑山伊巴」丹恩奴域，其中丹恩奴域仲未到香港，佢接受亞洲足協視像訪問時話仲等緊啲文件嘢，佢話：「我想踢亞冠盃，FC大邱唔留用我係有啲意外，我本來打算留喺南韓多一年，我舊年都踢得唔錯吖。我又真係好想踢亞冠盃，然後傑志搵我，好快就傾掂。」佢話最想同FC大邱同組，不過最後事與願違。今次東亞區分成五組，每組成績最好1隊同3組最好成績嘅第2名出線，傑志要努力突破2018年只得1勝嘅成績啦。
另外，亞協盃噚日都抽咗籤，不過香港所屬嘅東亞地區只有一組，所以東方龍獅同理文毫無疑問地被編入東亞唯一嘅J組，同組仲有中華台北代表台南市台鋼同埋蒙古嘅220體育會。