今年全民皆股，每年以玄學角度對股市作大膽預測嘅中信里昂，就推測大市將於8月力闖高峰；雖然之後會出現獲利回吐，但至年尾會再走高，「今年最佳時光喺夏季與冬季，其他時間各有盈虧」。
「執杖官」柯子聰話，將金牛與恒指所屬「土雞」合八字算一算，認為二者和諧相處對恒指係吉兆。上次「牛」展示強而有力嘅雙角係喺全球金融危機爆發後嘅2009年，今次將重出江湖，希望幫到恒指土雞擺脫困境。
里昂仲話今年初，牛未有恪守本份令市場下跌，故恒指於2月至4月份處於低位。其後鼠、牛解決分歧，牛於春末覺醒，並在夏季於金融田地日夜耕作，推動恒指於8月前後觸頂。秋收時節市場將獲利回吐，但可靠金牛仍有所出，冬季收官更會奮力一搏。
以五行揀股，金貫穿全年，預計金融及專業服務板塊於2月及3月暢旺；而水生金，與水相關的行業，如物流、航運及貿易，將於春季恢復狀態；科技、化妝品等與火相關嘅行業，喺春末同夏末應該有幾好表現。不過華華都喺嗰句，信不信由你！
李華華