【本報訊】政府突襲封區令港人人心惶惶，長生店林立的紅磡區近期至少錄得12宗確診，區內粥店亦有七名員工染疫，令居民擔心家園成為下一個「突閘」區。殯儀業人士指，該區長生店每日安排60多名先人出殯，若封區勢癱瘓業界運作，過去兩日多間長生店緊急將壽衣及死亡證等文件及殯儀用品運走，有店主擔心林鄭封紅磡「煩死人」，破口大罵：「遺體擺喺屋企呀？」
新增被劃為指定區域的紅磡，範圍包括差館里、船澳街、寶來街、溫思勞街及漆咸道北，內有近370幢樓宇，約有1.6萬人居住，但中產屋苑黃埔花園則不在範圍。在指定區域內的溫思勞街、必嘉街、老龍坑街及華豐街有過百間長生店及殯儀公司，當中70間是長生店，必嘉街的長樂大廈因有確診者，已納入強制檢測名單，當中14個舖位就有逾10間長生店，溫思勞街及老龍坑街一帶本月12至26日有12宗確診，情況嚴峻。
前晚深夜，區內長生店職員擔心當局或進一步封區，漏夜將殯儀用品包括壽衣、吉儀及簽名冊等放入尼龍袋運走，搬到其他地區擺放，以備未來數天一旦封區，可繼續安排先人出殯。業界稱本港每日約有140人去世，紅磡區長生店每日為60名先人出殯，如當局突襲封區，在沒預先通知下「攞唔到文件，隨時出唔到殯」癱瘓業界運作，更引發連鎖反應，因上周至今食環署210個遺體火化爐預約期已爆滿，即使只封區一兩日，亦要重新排期，亦恐怕醫院遺體累積，後果不堪設想。
有長生店東主爆粗大罵政府封區「嘥X氣」、「封乜X嘢呀封！」又反問：「封區我哋點做生意呀？啲人要出殯吖嘛，啱唔啱呀？遺體擺喺屋企呀？」他擔心封區會嚴重影響殯儀從業員生計，「啲人去食屎呀？」
從事殯儀逾40年的中盛殯儀董事長吳火明稱，農曆新年臨近，市民趕在年尾前替先人出殯，「我哋殯儀界都好擔心，如果封區，我哋點樣出殯，我哋啲工人點樣做嘢？」他認為政府應酌情處理封區問題，「人哋出殯定晒日子，訂晒殯儀館，棺材唔車上去點出殯呢？」又指「殯儀館日日都有人守夜，惟有殯儀館先可以擺棺材，如果封區咁可以擺去邊度呢? 靈車只可以擺一副棺材，擺兩副邊個肯？」
殯儀業商會理事長郭凱邦亦指業界擔心進一步封區，若殯儀店被封，即使只封一晚亦影響家屬、殯儀從業員及整個出殯程序，令先人無法出殯及火化。
若出現類似情況，責任歸咎政府，希望當局封區前提早至少兩、三天通知業界，或講明封區只針對三無大廈住戶，不影響殯儀館及長生店運作。另有長生店職員指突襲封區隨時令靈車被困，無法接收遺體。
不少紅磡街坊擔心突襲封區，昨趕緊購買米糧，長樂大廈女住客余女士擔心染疫，稍後會檢測，但擔心政府隨時封區而趕往買餸儲備。她指近日大廈衞生改善「多咗清潔消毒，有人掃地、洗地」。在指定區域一街之隔的黃埔花園，亦有居民外出添置日用品。紅磡街坊鍾先生指要買糧食做好準備，「要留喺屋企，佢（政府）派啲杯麵都唔想食啦！」昨午趕往超市買日用品的楊女士批政府封區擾民「唔知佢搞幾多日」，認為若封區一兩日還可接受，但「再多幾日都麻煩」。
九龍城區議員任國棟承認，區內舊樓衞生不理想，過往出現污水渠及糞渠錯駁情況，而且指定區域內有不少居於唐樓及劏房的基層、低收入人士，一旦封區限制他們出入必影響上班致手停口停。