沒有最衰，只有更衰。心諗七秒就好，糾纏太耐，好易被這個政府迫到發癲。大家一早講好嘛，見字飲水，留有用之軀，同佢鬥長命！
好彩有人沖喜，堅如長毛浪人，竟然與女戰友拉埋天窗，朋友們嘩嘩聲一地眼鏡碎片，真係恭喜佢地呀。這邊岑敖暉大個仔，與同齡女友甜蜜簽字，好人好事，一生幸福。
困在佐敦封城區內的七歲尼籍小孩，見到對面賓館開房緊貼報道的記者，站在窗前鬼馬晒Pepe公仔，戴蜘蛛俠面罩任影，最後手放頭頂做出心形手勢。小男孩胖胖的，落街不會被差佬罵「死肥仔」吧，尼籍男孩假如姓黎，就難講了。比他大些少、11歲的天水圍關注組主席王繼祖，落區勸喻大媽舞者將音響收細，離罩大叔眼見罵大肚婆「死肥婆」反綁雙手都得囉，動粗兼大罵王繼祖「如果你係我個孫，我斬死你呀！」大叔高尚情操成咁，斬人都會被拍膊頭放生吧！雖然佐敦做了「順民」示範，天水圍細路哥、土瓜灣大肚婆，從來都唔係好蝦的！抗爭香港人，從64歲長毛、27歲岑敖暉到11歲的王繼祖這條抗爭抗體人鏈如水隨形，該斷時斷，該續時續，斬？你估叉燒咩！