手機用戶請按此放大圖表
早排天水圍社區關注組創辦人、11歲嘅王繼祖因勸人唔好喺公園聚集跳大媽舞，結果俾阿伯襲擊，原本呢單嘢點睇都係阿伯唔啱，但點知中聯辦控制嘅《大公報》用頭版上綱上線插小學生王繼祖，一陣抹黑人係黃之鋒接班人，又揭人哋家庭背景。關注組噚日就喺fb反擊，鬧《大公報》一邊話保護學生，一邊揭小學生私隱，話王繼祖係之鋒接班人更加係「看圖作故事」。
《大公報》話王繼祖同之鋒合過照，就話人係「接班人」；王叫人去天水圍區議員林進辦事處拎口罩，就話有黃絲區議員關照，仲揭王嘅家庭資料，之後又訪問襲擊王嘅阿伯，鬧佢「小小年紀深懂抹黑伎倆」，但訪問最奇係，個阿伯自爆「與20至30名50歲至70歲長者街坊」跳舞，即係犯晒限聚令喇，但《大公報》完全當冇件事。
天水圍社區關注組喺fb發文反擊，話有關報道「我笑到hihi」，話佢哋係攬炒派區議員刻意扶植更加係荒謬，關注組一直旨在幫助低收入人士減輕買防疫物資嘅負擔，反問建制派嘅「香港出發大聯盟」向全港市民派發1,000萬個口罩，唔通又係「帶頭在港九新界進行暴亂搗亂香港？」
至於話王繼祖同之鋒合過照就係「接班人」，更加「笑大人個口」，因佢兩個只係傾過社區問題，而報道提及王家庭「支離破碎」，更加係唔尊重人私隱，關注組話有成員家庭唔「完美」，但唔代表會「學壞」，仲表明唔會收取任何捐款，可能又怕再畀左報屈收人錢。
李八方