前香港羽毛球1哥黃永棋當全職運動員15年，30歲的他仍努力去追羽球「第二春」；另邊廂年僅16歲的吳英倫，兩個月前成歷來最年輕全港冠軍，夢想是奪奧運金牌，2位港將相差14歲，但同流着印尼華僑父親的血，同為羽毛球勇敢追夢。
記者/攝影：徐嘉華
上一次跟黃永棋做訪問，是2018年雅加達亞運前，他跟父母在香港一間印尼餐廳，談着印尼文化及生活的點滴，沒想到當時精神奕奕的黃爸爸在2019年8月因心臟問題突然離世；訪問這天，永棋跟太太兼前香港羽球女單代表陳祉嘉帶着女兒黃馨（Mia）在大埔海濱公園家庭樂，小女孩下月才滿一歲，已走得不錯，拿着迷你羽毛球拍有模有樣，永棋笑指要女兒贏在羽球起跑線，盡早訓練她成為港版戴資穎（現世界一姐）。
多得女兒Mia，黃永棋才能淡忘父親離世的傷痛，兩件事相距僅半年，Mia在爺爺過身後半年出生，當時永棋喪父不久，又要在去年2月疫情爆發中迎接女兒來臨，悲喜交集得令一個大男人也不知所措。
「老竇一向係一家之主，佢處理晒屋企所有嘢，佢入院嗰陣我正喺泰國打東京奧運計分賽，媽咪叫我唔使擔心，喺泰國賽首圈出局後，我即時轉機票返香港，入手術室前佢仲好地地，點知手術後病情轉差，最後走咗，當時家姐仲喺美國，我好似一晚長大，要處理所有嘢，覺得要好好珍惜眼前有嘅嘢，我有諗係咪要繼續打落去，但媽咪話老竇好想我贏冠軍，唔應該喺呢刻放棄。」
黃永棋於9月重回賽場，越想贏冠軍報答父親就越打得不好，2019年9月到10月底去過台灣、中國、南韓、丹麥、法國及澳門比賽，每次都首圈出局，世界排名由原來25位跌至32位，失去主賽圈資格，比賽要從外圍賽打起，但疫情前比賽一直沒起色。
永棋的羽毛球路來自父親，60年代因印尼排華輾轉來到香港定居，跟同鄉的太太曾在官塘開印尼餐廳，永棋第一板波，就是爸爸在餐廳門口教他打。
羽毛球是印尼國技，黃永棋小學五年級開始每逢長假就跟父母到印尼練習，2004年印尼的陶菲克奪雅典奧運男單金牌，他讀中二：「當時我咁啱喺印尼練波，喺電視睇到陶菲克贏咗奧運金牌，我心諗之後要過佢頭。」翌年，永棋在喇沙讀完中三後轉做全職運動員至今15年：「要我揀多次都會係咁揀，嗰時羽毛球係我嘅夢想，所以應該勇敢去追。」
「記得轉做全職運動員嗰陣我15歲，目標係打奧運、打亞運、世界排名要去到頭10，要贏奧運獎牌，然後27、8歲退休，𠵱家諗番轉頭都有啲好笑，我27、8歲先去到自己羽毛球嘅『第一春』。」回看永棋這15年全職生涯，他曾於2008年獲亞青銅牌、2012倫奧男單代表、出戰3次亞運、2017年世界排名第10，2011年當過「林丹殺手」。
訪問這天的大埔海濱公園，是黃永棋一家三口這段疫情期間的親子樂園，如果不是疫情，永棋應不停出國比賽爭東奧積分，現在換來是跟女兒無價的經歷：「Mia第一次喊、第一次大小便、第一次換尿片、第一次沖涼、第一次識行，好多第一次我都喺佢身邊，唔係遙距視像可以比較。」太太力讚老公當了父親後，對女兒的一舉一動都很着緊，對家庭多了承擔，訪問時黃永棋時而讓Mia騎膊馬、時而牽着女兒小手漫步公園：「佢喺疫情下出世，大個後一定比其他人堅強，好想Mia再大啲，可以到球場睇我打波。」
女兒激發黃永棋決心追逐羽球「第二春」，現世界排名40的他是香港男單排名第3，疫情這一年訓練斷斷續續的永棋說：「同師弟係良性競爭，平時一齊訓練，會留意自己有咩不足，再去一步步追番以前嘅排位。」問他「第二春」的目標，他想也不想：「雖然打咗15年全職，但贏冠軍嘅欲望仲好強烈，我亦想挑戰世界頭八排名，2017年曾去過世界第10，可惜之後因為受傷冇得再進一步。」香港第一及第二男單是伍家朗及李卓耀。
大家可留意到黃家一家三口都穿上「Every shot counts」的黑色tee呢？黃永棋及嘉嘉近一年多創立了「黃永棋羽毛球會」，仍是港隊代表的永棋閒時會親自教授：「呢句口號嘅意思係『唔好放棄每一球』，我唔放棄我嘅羽球夢之餘，亦想培育下一代。」
去年11月全港羽毛球錦標賽的男單冠軍，是年僅16歲的Jason Gunawan，創了該賽歷來最年輕冠軍，更吸引眼球是他球衣上的英文名，明明一副香港「千禧后」的樣貌，何來這姓氏？原來這位在香港土生土長，年紀輕輕已身高1米80的年輕人，父母是印尼華僑，Gunawan是父親印尼姓氏，外公為他取了個中文名叫吳英倫：「中學時同學都叫我Gunawan，初時都幾介意佢哋叫我個姓，後來就慣咗。」
訪問這天，吳英倫跟帶他「入行」的爸爸打了一場五分友誼賽，誰也沒讓誰，吳父先開紀錄，但英倫從後趕上以「刁時」7:5險勝，問吳爸爸兒子可有進步，閒時會跟兒子在會所打羽毛球的他用英語很專業的說：「佢嘅『劈殺』比以前變化多咗。」
吳英倫的羽毛球路同樣源自父親，吳爸爸在印尼時曾是羽球省隊代表，青少年時是1992巴塞隆拿奧運男單銀牌阿迪的隊友，1998年從印尼移居香港後，羽球變了消閒運動，三子英倫四歲時開始教他，當年適逢2008北京奧運會，英倫記得在家中看林丹對李宗偉的男單決賽，從此認定羽毛球：「好記得佢贏咗京奧金牌後喺場上嘅慶祝動作，好型（林丹在主場2:0勝出後，即時握拳、雙腳跳起，然後十字形躺在球場上），林丹好有霸氣同成就，我想做到甚至超越佢。」
對於當時只有四歲的兒子有此遠大目標，吳爸爸說：「我當時冇當真，但睇住佢咁多年，我覺得個仔有奧運冠軍呢個目標係好事，但要一步步嚟，我哋都會支持佢。」
吳英倫在去年11月全港羽毛球錦標賽一戰成名前已是學界明星，小學已技壓同齡球手，小五及小六連奪兩屆小學精英賽男單冠軍，中學升上名校拔萃男書院亦獲獎無數，中二及中四分別協助男拔奪C Grade及B Grade團體冠軍，自己在中三及中四奪精英賽個人賽兩連冠，但突如其來的疫情加速英倫提早轉全職運動員，去年完成中四學業後，9月正式成為體院全職運動員。
「其實我一直都有做全職運動員嘅計劃，只係唔知幾時開始，但上年初疫情開始，令我冇辦法正常訓練，體院為咗防疫要封院，我當時係兼職運動員，所以唔可以入去訓練，只可以喺屋企自己練，生活好悶，好想快啲有正常練習，於是9月就決定轉做全職。」吳英倫2016年中一升中二時加入港青，開始到體院跟大港隊一同訓練，1星期有2至3天全日在體院：「同師兄訓練對我好有幫助，佢哋嘅訓練強度同實力都好強，我每日跟佢哋嘅速度去練，令我進步好快，力量同速度提升得最多，雖然我唔捨得高中生活，但冇辦法，最後選擇咗『夢想』。」
英倫去年讀完中四後轉做全職的決定沒嚇壞父母，反而得到他們更大的支持，吳爸爸說：「最初我同老婆都想個仔讀埋中學，但疫情突然殺到，佢又完全入唔到體院訓練，讀書之後可以再讀，衡量過佢嘅羽毛球天份，我哋唔想浪費。」吳家每逢農曆新年都會飛赴印尼雅加達探親，英倫小時候亦在暑假飛去印尼練波，打好底子。現在體院集宿集訓的他，最想盡快有比賽，他上一次國際賽是去年3月德國及荷蘭的青少年比賽。
在今次英倫帶來的難忘獎牌中，包括有全港精英賽男單冠軍獎座、自己首個國際賽金牌（2018新加坡國際青少年賽U15）、自己首個最大型賽事銀牌（2019亞洲青少年賽U17），但就獨欠11月全港羽毛球錦標賽金牌，當時他在4強爆冷以2:0擊敗世界排名第8的香港1哥伍家朗，決賽就以2:1勝師兄陳延澤，以16歲之齡成本賽最年輕冠軍：「呢個全港賽冠軍，我主要係平常心、冇畀太大壓力自己，亦冇抱太高期望，反而對手係承受住好大壓力，咁我先贏到，我同佢哋仲有差距。」
踏入新一年，吳英倫已鎖定兩個大賽目標，一個是7月的亞青賽以及10月世青賽，這些都是他晉身大港隊的必經之路；外公給他起了個中文名「英倫」，吳爸爸笑說：「可能公公想佢有一日喺全英賽贏牌。」全英賽是世巡賽1000的頂級比賽，亦是英倫通往奧運金牌夢的一大考驗。
這兩位印尼華僑同鄉，雖然一個在職業生涯剛起步，一個已到尋求「第二春」的年紀，但對羽球熱愛不相伯仲，不時跟師弟交換心得的黃永棋，看好吳英倫具備衝擊最高水平條件：「佢身體條件好好，體力、意志力、專注度都好突出。」英倫亦多謝師兄時常提點，令自己少走冤枉路。