熱刺周一喺英足盃第4圈作客4:1淘汰英冠包尾嘅韋甘比，但過程絕唔輕鬆。25分鐘熱刺就先失波，俾對手奧耶迪馬攻破大門，好在今仗踢足全場嘅加里夫巴利，喺上半場補時追平1:1，值得一提，巴利喺英足盃近6次為熱刺正選上陣直接參與咗9個入球，當中包括4個入球同5次助攻，今場佢追和呢一球，就係佢自2013年對高雲地利以嚟，相隔咗2,942日後再喺英足盃入波。
點知下半場熱刺攻極都唔入，搞到領隊摩連奴要換入哈利卡尼同孫興民呢班主力落場，結果去到86分鐘打後，先靠哈利雲克斯同尼當比利梅開二度，連入三球奠勝。賽後摩佬都話好驚要加時，但就講到明唔會放棄任何比賽咁話。熱刺晉級之後，會喺第五圈對都係英超嘅愛華頓。