ViuTV劇集《太平紋身店》已播出第二周，大戰無綫來勢洶洶的《陀槍師姐2021》。林德信於《太平紋身店》飾演暖男廚師，並與女主角周秀娜等有不少對手戲，他說自己的角色是緩和全劇緊張氣氛︰「我喺劇入面嘅角色係FoodDragon，夢想做廚師開茶餐廳，雖然成個劇幾暗黑同刀光劍影，但我個角色就負責搞笑同帶幽默，所以每次埋位同佢哋都好似拍緊兩套劇咁，我個角色就好溫暖，其他人戲份好沉重，又報仇又打打殺殺。」Alex指演搞笑戲很大挑戰︰「對白要準，要做到好笑唔易，不過見到娜姐都忍唔住笑，我好大滿足感。2021年我哋周圍好多唔開心嘢，能夠帶畀人哋歡笑都係好事嚟。」
忙完新劇宣傳後，Alex推出新歌《愛沒有理由》，講細水長流的感情，Alex雖經歷父母離婚，但依然相信細水長流的愛情，因他見證外公外婆執子之手的愛︰「婆婆已經唔喺度，但我睇住佢病咗十年，公公都喺佢身邊不離不棄咁照顧佢，所以我覺得如果大家緣份夠，感情係可以一生一世到老。」經歷三次失戀，Alex與清酒侍酒師女友Candace Poon已拍拖五年，早前更帶女友為父親慶祝生日，他承認彼此感情穩定，但撞正疫情，結婚可能要推遲一步︰「我係想結婚，但我係個好有計劃嘅人，今年莫講話要計劃一個好開心嘅婚禮，連工作都冇得plan，所以結婚真係唔會諗住，見一步行一步。」