香港人齊上齊落力撐手足同黃圈唔係得個講字，好似上年底逆巿開業嘅元朗黃店「亞萊泰菜」，想剛出獄手足可以過肥年，宣佈噚日請對方做「一日店員」，將全日營業額扣除成本全數出糧畀手足，結果大件事喇，開門前半個鐘已經排出人龍，到中午仲有近百人排隊等機會出手「懲罰」。
「亞萊泰菜」老闆Oscar同八方講，因見到好多被捕同坐監手足有生活負擔，決定幫相識多時、出獄時銀行戶口得番300幾蚊嘅手足李先生，但對方堅拒接受捐款，於是改為請對方做一日店員，但冇諗過外界反應咁熱烈，同路人嘅「懲罰」真係唔係講笑，小店下晝一度出帖「求饒」，問可唔可以有中場休息「食枝煙」，但大家一於少理，仲有唔少留言話入緊去元朗幫襯，八方仲見元朗區議員張秀賢夜晚都有去，仲即場報料預計要等成個鐘，仲話「為咗支持手足都值嘅」。
做咗一日店員嘅李生坦言至今無悔，對唔少後生仔因為參與運動坐監感到心痛，佢亦冇打算袋起人工，因為知道612基金之前告急，希望將啲錢捐畀612，睇見香港人咁齊心，八方相信寒冬雖冷，但大家一齊逆風而行，一定可以走出黑暗。
李八方