甚麼叫做宣傳？大師級人馬係李居明。80年代他出身自洲立電影公司，負責西片宣傳，後獲黄百鳴賞識，跳槽至新藝城影業。再之後，搞風水術數致富，目前身家以億計算。電影宣傳學問多多，但基本原理和風水宣傳大同小異。一是引起注意、二是挑起幫襯意欲、三是成為眾人話題。電影宣傳是要搞「叫座」，即引誘觀眾買飛入場，而不是搞「叫好」。「叫好」是產品品質問題，不是宣傳之目的。
前陣子李居明話口罩加持一事，笑瓜人，但宣傳目的達到。人人記得李居明，冇人理會加持到底有冇效。這叫「宣傳」。去年上映的《麥路人》水平甚差，但宣傳成功，因為製作人引咗你入場，事後觀眾更討論影片到底是否垃圾。
又講一經典港產電影《靚妹仔》宣傳之逸事。話說80年代初麥當雄離開電視台，進軍電影界，但缺乏財團支持，故第一炮只能低成本製作，破釜沉舟放手一搏。《靚妹仔》由黎大煒執導，文雋編劇，湯寶生（Bob Thompson）攝影，演員全部新人，包括溫碧霞、林碧琪及麥德和。當年上映前，除麥當雄略有名氣外，冇人知幕前幕後其他人係乜水。那如何宣傳才好呢？
話說80年代香港風氣保守，《靚妹仔》唯一賣點是寫實，並揭露了一些社會問題。於是乎麥帥心生一計，除招待一般影評人及報界寫稿佬睇戲外，更特別邀請教協主席司徒華看片。這招厲害，事後司徒華大罵此片傷風敗俗，意識不良。教育界亦跟隨司徒華的腔調，對電影口誅筆伐。於是《靚妹仔》忽然成為社會話題，文化界討論之焦點。
更妙的是，教書佬呱呱大叫，引起了李翰祥導演注意，跑去買票看片。已故的李翰祥當年可不得了，他除了是邵氏旗下的大導演之外，更在報刊撰寫電影專欄《三十年細說從頭》，讀者多不勝數，其文章影響力極之巴閉。李導看片後，非常欣賞麥當雄及黎大煒的拍攝手法，更在專欄連續寫了七天，大讚《靚妹仔》。
於是乎滿城風雨，文化界電影界教育界……爭相討論，到底司徒華迂腐還是李導抬槓？結果，漁人得利，《靚妹仔》票房賣個滿堂紅。之後，麥當雄在影壇站穩腳步，成立麥當雄製作公司。至於黎大煒及文雋，兩人知名度大增，文雋更成為影壇編劇界搶手貨。湯寶生後來亦獲李翰祥賞識，北上拍攝《垂簾聽政》及《火燒圓明園》兩套超級大製作。
所以宣傳這家嘢，別怕人罵。漠不關心才最大鑊。
＊註：李翰祥當年大讚《靚妹仔》的七篇文章，收錄在其著作《三十年細說從頭》第四冊，217至233頁。
撰文：區紹熙
本欄逢周二刊出
【光影漫步】
超級戲迷，嬉笑怒罵品評新片。漫步影壇細說從頭。著有《港產片真巴閉》一書。
